Gujarati Mid-day
Happiest Places to Work

ઇ-પેપર

વેબસ્ટોરીઝ

વેબસ્ટોરીઝ

બ્રેકિંગ સમાચાર

App banner App banner
હોમ > સ્પોર્ટ્સ સમાચાર > ક્રિકેટ > આર્ટિકલ્સ > ૪૨ વારની ચૅમ્પિયન ટીમ મુંબઈને હરાવીને વિદર્ભે ગયા વર્ષની ફાઇનલનો બદલો લીધો

૪૨ વારની ચૅમ્પિયન ટીમ મુંબઈને હરાવીને વિદર્ભે ગયા વર્ષની ફાઇનલનો બદલો લીધો

Published : 22 February, 2025 09:36 AM | IST | Mumbai
Gujarati Mid-day Correspondent | feedbackgmd@mid-day.com

સેમી ફાઇનલમાં વિદર્ભે આપેલા ૪૦૬ રનના ટાર્ગેટ સામે ૩૨૫ રને ઑલઆઉટ થઈ ૮૦ રનથી હારી ગયું મુંબઈ

પ્રતીકાત્મક તસવીર

પ્રતીકાત્મક તસવીર


નાગપુરમાં રમાયેલી રણજી ટ્રોફી ૨૦૨૪-’૨૫ની સેમી ફાઇનલના અંતિમ દિવસે જીત માટે મુંબઈને ૩૨૩ રન અને વિદર્ભને સાત વિકેટની જરૂર હતી, જેમાં વિદર્ભે ઝડપથી સાત વિકેટ લઈને ડિફેન્ડિંગ ચૅમ્પિયન મુંબઈને ૮૦ રને હરાવીને સતત બીજી વાર અને ઓવરઑલ ચોથી વાર રણજી ટ્રોફીની ફાઇનલમાં સ્થાન મેળવવામાં સફળતા મેળવી હતી. ૨૦૧૭-’૧૮ અને ૨૦૧૮-’૧૯ સીઝનની રણજી ટ્રોફી ચૅમ્પિયન ટીમ વિદર્ભે ૪૨ વારની ચૅમ્પિયન મુંબઈ માટે મોટો અપસેટ સરજ્યો હતો. વિદર્ભની ટીમે પહેલી ઇનિંગ્સમાં ૩૮૩ રન અને બીજી ઇનિંગ્સમાં ૨૯૨ રન કરીને મુંબઈને જીત માટે ૪૦૬ રનનો ટાર્ગેટ આપ્યો હતો. પહેલી ઇનિંગ્સમાં ૨૭૦ રન કરનાર મુંબઈ બીજી ઇનિંગ્સમાં ૯૭.૫ ઓવરમાં ૩૨૫ રનના સ્કોર પર ઑલઆઉટ થઈ ગયું હતું. આ રીતે વિદર્ભે ગયા વર્ષે મુંબઈ સામે રણજી ફાઇનલમાં મળેલી હારનો બદલો લીધો હતો.


મુંબઈના નીચલા ક્રમના બૅટ્સમેનોએ મૅચને અંત સુધી રોમાંચક બનાવી રાખી. શાર્દૂલ ઠાકુરે ફરી એક વાર પોતાના બૅટિંગ-કૌશલ્યનું પ્રદર્શન કર્યું અને ૧૨૪ બૉલમાં પાંચ ચોગ્ગા અને એક છગ્ગાની મદદથી ૬૬ રન બનાવ્યા. શાર્દૂલે શમ્સ મુલાની (૪૬ રન) સાથે સાતમી વિકેટ માટે ૧૦૩ રન જોડ્યા. રૉયસ્ટન ડાયસ (૨૩ રન) અને મોહિત અવસ્થી (૩૪ રન)એ છેલ્લી વિકેટ માટે બાવન રન ઉમેર્યા અને મુંબઈનો સ્કોર ૩૦૦ રનને પાર કરવામાં સહયોગ આપ્યો હતો. પુણેના બાવીસ વર્ષના સ્પિનર હર્ષ દુબેએ બીજી ઇનિંગ્સમાં ૧૨૭ રન આપીને પાંચ વિકેટ લીધી, જેને કારણે ૪૦૬ રનના લક્ષ્યાંકનો પીછો કરતી મુંબઈની ટીમ ૩૨૫ રનમાં ઑલઆઉટ થઈ ગઈ. ૫૪ અને ૧૫૧ રનની ઇનિંગ્સ રમનાર વિદર્ભનો મિડલ ઑર્ડર બૅટર યશ રાઠોડ પ્લેયર ઑફ ધ મૅચ બન્યો હતો.



રણજી ટ્રોફી ૨૦૨૪-’૨૫ની ફાઇનલ મૅચ ક્યારે રમાશે?


૨૦૨૪ની ૧૧ ઑક્ટોબરે શરૂ થયેલી રણજી ટ્રોફી ૨૦૨૪-’૨૫ની સીઝન હવે એના ફાઇનલ મુકામ પર પહોંચી ગઈ છે. વિદર્ભ અને કેરલા વચ્ચે ૨૬ ફેબ્રુઆરીથી બે માર્ચ વચ્ચે ફાઇનલ મૅચ રમાશે. બે વારની રણજી ટ્રોફી ચૅમ્પિયન ટીમ વિદર્ભ સામે કેરલાને પહેલી વાર ચૅમ્પિયન બનવાની તક રહેશે. અહેવાલ અનુસાર આ ફાઇનલ મૅચ નાગપુરના વિદર્ભ ક્રિકેટ અસોસિએશનના સ્ટેડિયમમાં જ રમાઈ શકે છે.


Whatsapp-channel Whatsapp-channel

22 February, 2025 09:36 AM IST | Mumbai | Gujarati Mid-day Correspondent

App Banner App Banner

અન્ય લેખો


This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK
News Hub