સતત બીજી જીત સાથે પંજાબ બીજા નંબર પર

લખનઉના ૧૭૨ રનના ટાર્ગેટને ૧૬.૨ ઓવરમાં ચેઝ કરીને ૮ વિકેટે જીત મેળવી પંજાબે : કૅપ્ટન શ્રેયસ ઐયરે સતત બીજી મૅચમાં ૫૦ પ્લસ રનની અણનમ ઇનિંગ્સ રમી જીતમાં મુખ્ય ભૂમિકા ભજવી

બૉલીવુડ સિંગર મિકા સિંહના પર્ફોર્મન્સ બાદ શરૂ થઈ લખનઉ અને પંજાબની મૅચ.

IPL 2025ની ૧૩મી મૅચમાં લખનઉ સુપર જાયન્ટ્સને આઠ વિકેટે હરાવીને પંજાબ કિંગ્સે સીઝનની બીજી જીત નોંધાવી છે. પોતાના હોમ ગ્રાઉન્ડમાં સીઝનની પહેલી મૅચ રમતાં લખનઉએ સાત વિકેટ ગુમાવીને ૧૭૧ રન ફટકાર્યા હતા. જવાબમાં પંજાબની ટીમે ૧૬.૨ ઓવરમાં બે વિકેટે ૧૭૭ રન ફટકારી ટાર્ગેટ ચેઝ કરી લીધો હતો. સતત બીજી જીત સાથે પંજાબની ટીમ લખનઉ સામે સળંગ ત્રીજી મૅચમાં હારતાં પણ બચ્યું હતું. પંજાબની ટીમે પૉઇન્ટ્સ-ટેબલમાં પાંચમા ક્રમથી બીજા ક્રમે છલાંગ લગાવી દિલ્હી કૅપિટલ્સનું નંબર-ટૂનું સ્થાન છીનવી લીધું હતું.

પંજાબના કૅપ્ટન શ્રેયસ ઐયરે બાવન રન ફટકાર્યા હતા.

ADVERTISEMENT

ટૉસ હારીને બૅટિંગ કરવા ઊતરેલી લખનઉની ટીમે ૪.૫ ઓવરમાં ૩૫ રનના સ્કોર પર ત્રણ વિકેટ ગુમાવી દીધી હતી ત્યારે વાઇસ-કૅપ્ટન નિકોલસ પૂરન (૩૦ બૉલમાં ૪૪ રન) અને યંગ બૅટર આયુષ બદોની (૩૩ બૉલમાં ૪૧ રન)એ ચોથી વિકેટ માટે ૫૪ રનની ભાગીદારી કરીને ટીમની ઇનિંગ્સ સંભાળી હતી. બદોનીએ ડેથ ઓવર્સમાં પણ મુખ્ય ભૂમિકા ભજવી હતી, જ્યાં તેણે અનુભવી ફિનિશર ડેવિડ મિલર (૧૮ બૉલમાં ૧૯ રન) સાથે પાંચમી વિકેટ માટે ૩૦ રન અને અબ્દુલ સમદ (૧૨ બૉલમાં ૨૭ રન) સાથે ૪૭ રનની પાર્ટનરશિપ કરીને ટીમનો સ્કોર ૧૭૧ સુધી પહોંચાડવામાં મદદ કરી હતી.

લખનઉ સુપર જાયન્ટ્સનો IPLનો સૌથી મોંઘો કૅપ્ટન રિષભ પંત સતત ત્રીજી ઇનિંગ્સમાં ફ્લૉપ રહ્યો.

IPLનો સૌથી મોંઘો પ્લેયર અને કૅપ્ટન, લખનઉનો રિષભ પંત પાંચ બૉલમાં માત્ર બે રન બનાવી કૅચઆઉટ થયો હતો. ૨૭ કરોડ રૂપિયાનો આ પ્લેયર સળંગ ત્રીજી મૅચમાં ફ્લૉપ રહ્યો હતો. પંજાબ કિંગ્સ તરફથી અર્શદીપ સિંહ સૌથી સફળ બોલર રહ્યો, તેણે ૪૩ રન આપીને ત્રણ વિકેટ લીધી, જ્યારે ઇન્જરીમાંથી વાપસી કરનાર ફાસ્ટ બોલર લૉકી ફર્ગ્યુસન, માર્કો યાન્સેન સહિત સ્પિનર્સ યુઝવેન્દ્ર ચહલ અને ગ્લેન મૅક્સવેલને ૧-૧ સફળતા મળી હતી.

દિલ્હીની ડોમેસ્ટિક ટીમના સાથી પ્લેયર પ્રિયાંશ આર્યને આઉટ કર્યા બાદ સ્પિનર દિગ્વેશ સિંહ રાઠીએ કર્યું વિચિત્ર સેલિબ્રેશન.

૧૮મી સીઝનની સતત બીજી ઇનિંગ્સમાં ૫૦ પ્લસ રનની અણનમ ઇનિંગ્સ રમનાર પંજાબના કૅપ્ટન શ્રેયસ ઐયરે (૩૦ બૉલમાં બાવન રન અણનમ) બે મોટી ભાગીદારી કરીને ૧૭૨ રનના ટાર્ગેટને સરળતાથી ચેઝ કરી લીધો હતો. તેણે વિકેટકીપર-બૅટર પ્રભસિમરન સિંહ (૩૪ બૉલમાં ૬૯ રન) સાથે બીજી વિકેટ માટે ૮૪ રન અને યંગ બૅટર નેહલ વઢેરા (પચીસ બૉલમાં ૪૩ રન અણનમ) સાથે અણનમ ૬૭ રનની પાર્ટનરશિપ કરી હતી. લખનઉ તરફથી માત્ર યંગ સ્પિનર દિગ્વેશ સિંહ રાઠી (૩૦ રનમાં બે વિકેટ) જ વિકેટ લેવામાં સફળ રહ્યો હતો.