જ્યાફતઃ નડિયાદની ઓળખ સમા બિહાર સમોસા, સ્વાદ અને સાઇઝ બંન્નેમાં પડશે ચટાકો

બિહારી સમોસાનો પરિચય આપું તો હથેળીમાં માંડ-માંડ સમાય તેટલું મોટું સમોસું, ફરસી પુરી જેવું ઉપરનું પડ અને તેને તોડીને ફરસી પુરીની જેમ અલગ ખાવાાની પણ મજા આવે, અંદર બટેટાના ઝીણા કટકા અને છીણનું હળવા મસાલા સાથેનું કટિંગ, તેનો તોડવામાં આવે ત્યારે ખચ્ચ.... અવાજ આવે અને જોઇને જ મ્હોમાં પાણી આવી જાય પછી ડીશને એક સ્ટીલના નળાની નજીક લઇ જઇને સમોસાને ખાટી-મીઠ્ઠી લાલ ચટ્ટણીમાં સ્નાન કરાવી દે અને પછી એના ઉપર લીલી ચટણી નાખે ત્યાં સુધીમાં તો માણસનું એક્સાઇટમેન્ટ એટલું વધી ગયું હોય કે પોતાનું બીપી વધી જાય તે પહેલા તો આપણે સમોસુ મોઢામાં નાખી જ દેવું પડે. હા.હા...હા. મજાક કરુ છું. નડિયાદમાં ઘંટવાળા બિહારી સમોસા અને તેની પીરસવાની સ્ટાઇલનું વર્ણન કર્યું છે. ચાલો આજે મારી સાથે નડિયાદના પ્રખ્યાત બિહારી સમોસાની સફરે અને જાણીયે તેના ઇતિહાસથી લઇને વર્તમાન સુધીની વાતો.   ગુજરાતમાં રેસ્ટોરન્ટ્સ અને સ્ટ્રીટ ફુડ વિશે લખનારાઓમાં પૂજા સાંગાણીનું નામ જાણીતું છે. મિડ-ડે અખબારમાં લગલગાટ બે વર્ષ સુધી ખાઇ પીને મોજ નામની કોલમથી તેઓએ ગુજરાતી ફુડને સ્વાદ રસિયાઓ સમક્ષ રજૂ કર્યું ત્યારે હવે તેઓ ડિજિટલી સ્વાદની "જ્યાફત" આપણી સાથે શૅર કરશે. ફૂડી પૂજા ગાંધીનગરમાં જન્મ્યાં અને વડોદરામાં ઉછર્યાં. અંગ્રેજી સાહિત્યમાં માર્સ્ટર્સ કરનારા પૂજા ગુજરાતી અને અંગ્રેજી બંન્ને ભાષામાં કોન્ટેન્ટ રાઇટિંગ કરતાં આવ્યા છે. તે ફૂડ રાઇટર જ નહીં પણ ફૂડ બ્લોગર પણ છે અને સોશ્યલ મીડિયા સ્ટ્રેટેજિસ્ટ તરીકે પણ કામ કરે છે. ફૂડ બ્લોગર, ફૂડ લેખિકા અને સોશિયલ મિડીયા સ્ટ્રેટેજીસ્ટ તરીકે પોતાના અનુભવનો લોકોને લાભ આપે છે. તેઓ સોશ્યલ મીડિયા પર પણ પોતાના લખાણો મુકે છે તથા તેમના કામને પગલે બે એવોર્ડ પણ તેઓ મેળવી ચૂક્યાં છે. નવા રેસ્ટરન્ટ્સ ખૂલે કે કોઇ નવો ફૂડ ટ્રેન્ડ હોય તે અચૂક ત્યાં પહોંચે અને સ્વાદ રસિકોને માર્ગદર્શન પણ આપતા રહે છે. ચાલો માણીએ જ્યાફત. (તસવીરો – પૂજા સાંગાણી)