જ્યાફતઃ ગુજરાત મેં પક રહી હૈ ખીચડી, અવનવી ખીચડી બનાવતી રેસ્ટોરન્ટની બોલબાલા

આપણા ગુજરાતીઓમાં એવી કેટલીક વાનગીઓ છે જે સમાન્ય જીવનના ઘટનાક્રમ સાથે વણાઇ ગઇ છે. એમાની એક વાનગી એટલે ખીચડી. શુધ્ધ, સાત્વિક અને હળવા ખોરાકની શ્રેણીમાં ગણાતી સર્વગુણ સંપન્ન એવી વન પૉટ મીલ ખીચડીનું હવે આધુનિકરણ થઇ ગયું છે અને તે નવા જમાનાના બદલાવ પ્રમાણે નવા ટેસ્ટ અને સ્વરૂપમા બને છે અને ટ્રેન્ડીંગ કરી રહી છે. લોકો પ્રેમથી આરોગે છે. ખીચડી આરોગવાનું ચલણ આઉટ ઓફ ટ્રેન્ડ જતું જ નથી. રેસ્ટોરન્ટ્સ કે ઢાબામાં બીજી વાનગીઓ સાથે તો ખીચડી મળતી જ હોય છે પરંતુ માત્ર અને માત્ર ખીચડી સર્વ કરતી રેસ્ટોરન્ટસ ખુલી ગઈ છે અને ધૂમ પણ મચાવે છે. ખેર આ બધી તો બહુ વાતો થઇ પરંતુ આપણે આજે એક એવા સ્થળની ખીચડીની વાત કરવાની છે કે જેમણે ખીચડીના ટેસ્ટનો એક અનેરો અનુભવ કરાવ્યો છે.  ગુજરાતમાં રેસ્ટોરન્ટ્સ અને સ્ટ્રીટ ફુડ વિશે લખનારાઓમાં પૂજા સાંગાણીનું નામ જાણીતું છે. મિડ ડે અખબારમાં લગલગાટ બે વર્ષ સુધી ખાઇ પીને મોજ નામની કોલમથી તેઓએ ગુજરાતી ફુડને સ્વાદ રસિયાઓ સમક્ષ રજૂ કર્યું ત્યારે હવે તેઓ ડિજિટલી સ્વાદની "જ્યાફત" આપણી સાથે શૅર કરશે. ફૂડી પૂજા ગાંધીનગરમાં જન્મ્યાં અને વડોદરામાં ઉછર્યાં. અંગ્રેજી સાહિત્યમાં માર્સ્ટર્સ કરનારા પૂજા ગુજરાતી અને અંગ્રેજી બંન્ને ભાષામાં કોન્ટેન્ટ રાઇટિંગ કરતાં આવ્યા છે. તે ફૂડ રાઇટર જ નહીં પણ ફૂડ બ્લોગર પણ છે અને સોશ્યલ મીડિયા સ્ટ્રેટેજિસ્ટ તરીકે પણ કામ કરે છે. ફૂડ બ્લોગર, ફૂડ લેખિકા અને સોશિયલ મિડીયા સ્ટ્રેટેજીસ્ટ તરીકે પોતાના અનુભવનો લોકોને લાભ આપે છે. તેઓ સોશ્યલ મીડિયા પર પણ પોતાના લખાણો મુકે છે તથા તેમના કામને પગલે બે એવોર્ડ પણ તેઓ મેળવી ચૂક્યાં છે. નવા રેસ્ટરન્ટ્સ ખૂલે કે કોઇ નવો ફૂડ ટ્રેન્ડ હોય તે અચૂક ત્યાં પહોંચે અને સ્વાદ રસિકોને માર્ગદર્શન પણ આપતા રહે છે. ચાલો માણીએ જ્યાફત. (તસવીરો – પૂજા સાંગાણી)