ગુજરાતી મિડ-ડે ડૉટ કૉમ તમારી માટે લઈને આવ્યું છે `વન્ડર વુમન`ની ખાસ રજૂઆત. આમ તો સમાજની દરેક મહિલા પોતાના `સ્ત્રીત્વ`ના બળે જીવનમાં ઊંચાઈને પામે છે. વળી, આપણી આસપાસ પણ એવી અનેક મહિલાઓ છે, જેમના સમર્પણ, જુસ્સા અને અડગ નિશ્ચયે તેમને નવા મુકામ આપ્યા છે! એક સ્ત્રી ધારે તો શું ન કરી શકે? નિર્દોષ, નિષ્કામ ને નિરાભિમાની નજર વડે જોશો તો પુરુષ સમોવડી થયેલી અનેક સ્ત્રીઓના પ્રેરણાદાયી ઉદાહરણો તમને સાંપડશે. મોટી ઉંમરના ઉંબરાને પણ સહજતાથી ઠેંકીને સ્ત્રી પોતાના શોખને જીવંત કરતી હોય છે. અહીં અમે એવી જ પ્રેરક મહિલાઓની વાત માંડીશું જેઓએ ધીરજ અને આત્મવિશ્વાસની આંગળી પકડીને જીવનમાં નવેસરથી ડગ ભર્યાં છે. ન માત્ર પોતાના કે પોતાના પરિવાર માટે કિન્તુ સમાજના બળબળતાં પ્રશ્નો સામે ઝઝૂમવા માટે મીટ માંડી છે. બેચલરની ડિગ્રી હોય, બિઝનેસ હોય કે પછી હોય બોક્સિંગ! આ પ્રેરણાદાયી મહિલા તો સમાજની સૌ સ્ત્રી માટે અજવાળું બની છે. આજનાં આપણાં ‘વન્ડર વુમન’ છે ઊર્મિલા જમનાદાસ આશર. જિંદગી કપરા ઘા આપતી ગઈ, પણ તેની સામે ઝઝૂમીને ઢળતી ઉંમરે પણ ઊર્મિલા બાએ હિંમતભેર ઊભા થઈ નાસ્તાનો બિઝનેસ શરૂ કર્યો. અને એ એટલો તો પ્રચલિત થયો કે આજે `ગુજ્જુબેનના નાસ્તા`નો વિશ્વમાંય ડંકો વાગે છે! ૮૦ વર્ષનાં ઊર્મિલા બા આજે નારી રતન ગૌરવ એવોર્ડ સુધી પહોંચ્યાં છે. તેઓએ ગુજરાતી મિડ-ડે ડૉટ કૉમ સાથે પોતાની આ સફર વિષે વાત કરી. ચાલો, એમની જુસ્સાભેર કહાની જાણીએ.
18 December, 2024 10:01 IST | Mumbai | Dharmik Parmar
