કાલે દશેરાના પર્વ સાથે નવરાત્રીની પૂર્ણાહૂતિ થવાની છે. દશેરાના દિવસે ગુજરાતમાં લાખો ગુજરાતીઓ ફાફડા સાથે જલેબીનો સ્વાદ માણશે. આ પ્રથા એટલી લોકપ્રિય બની ગઈ છે કે હવે નવાઈ પણ ન લાગે કે ફાફડા અને જલેબીનું આ અનોખું સંયોજન કેવી રીતે સર્જાયું હશે. અસરાનીનું લોકપ્રિય ગુજરાતી ગીત તો બધાને યાદ હશે, `હું અમદાવાદનો રીક્ષા વાળો,` જેમાં `રીચી રોડના અડ્ડા જેવી, હોટલ એક વખણાય, જ્યાં ગરમ ફાફડા, ગરમ જલેબી નાના મોટા ખાય` ગાવામાં આવ્યું છે. આ પંક્તિઓ રીચી રોડ, જે હવે ગાંધી રોડ તરીકે ઓળખાય છે પર આવેલ ઐતિહાસિક ચંદ્રવિલાસ રેસ્ટોરન્ટને વિશેષ રીતે ઉજાગર કરે છે. ફાફડા જલેબીના પ્રખ્યાત કોમ્બિનેશનની શરૂઆત અમદાવાદની ચંદ્રવિલાસ રેસ્ટોરન્ટ દ્વારા 124 વર્ષ પૂર્વે, ચિમનલાલ હેમરાજ જોશીએ કરી હતી. આ રેસ્ટોરન્ટની શરૂઆત સૌથી પહેલાં ચા વેચવાથી થઇ હતી.
ગુજરાતમાં રેસ્ટોરન્ટ્સ અને સ્ટ્રીટ ફુડ વિશે લખનારાઓમાં પૂજા સાંગાણીનું નામ જાણીતું છે. મિડ-ડે અખબારમાં લગલગાટ બે વર્ષ સુધી ખાઇ પીને મોજ નામની કોલમથી તેઓએ ગુજરાતી ફુડને સ્વાદ રસિયાઓ સમક્ષ રજૂ કર્યું ત્યારે હવે તેઓ ડિજિટલી સ્વાદની "જ્યાફત" આપણી સાથે શૅર કરશે. ફૂડી પૂજા ગાંધીનગરમાં જન્મ્યાં અને વડોદરામાં ઉછર્યાં. અંગ્રેજી સાહિત્યમાં માર્સ્ટર્સ કરનારા પૂજા ગુજરાતી અને અંગ્રેજી બંન્ને ભાષામાં કોન્ટેન્ટ રાઇટિંગ કરતાં આવ્યા છે. તે ફૂડ રાઇટર જ નહીં પણ ફૂડ બ્લોગર પણ છે અને સોશ્યલ મીડિયા સ્ટ્રેટેજિસ્ટ તરીકે પણ કામ કરે છે. ફૂડ બ્લોગર, ફૂડ લેખિકા અને સોશિયલ મીડિયા સ્ટ્રેટેજિસ્ટ તરીકે પોતાના અનુભવનો લોકોને લાભ આપે છે. તેઓ સોશ્યલ મીડિયા પર પણ પોતાના લખાણો મુકે છે તથા તેમના કામને પગલે બે એવોર્ડ પણ તેઓ મેળવી ચૂક્યાં છે. નવા રેસ્ટરન્ટ્સ ખૂલે કે કોઇ નવો ફૂડ ટ્રેન્ડ હોય તે અચૂક ત્યાં પહોંચે અને સ્વાદ રસિકોને માર્ગદર્શન પણ આપતા રહે છે. ચાલો માણીએ જ્યાફત. (તસવીરો – પૂજા સાંગાણી)
11 October, 2024 03:47 IST | Ahmedabad | Gujarati Mid-day Online Correspondent
