એક ખૂબ જ જાણીતી હિન્દી ફિલ્મનો જાણીતો સંવાદ છે “મર્દ કો કભી દર્દ નહીં હોતા”, પુરુષોનું આવું જ ચિત્રણ કવિ નર્મદ પોતાની કવિતામાં કરતાં લખે છે “મર્દ તેહનું નામ, સમો આવ્યો કે ચાલે; કનક કામિની તજી, સજી રણમાં મ્હાલે.” પુરુષોની આ કઠણ અને કડક વલણ ધરાવતી છબી કાયમ રાખવામાં સમાજે દિલથી મહેનત કરી છે. લોકો એ વાતને તો સ્વીકારે છે કે પુરુષો નારિયેળ જેવા છે, પણ તેનાથી પણ ઓછા લોકો સમજી શકે છે કે આ નારિયેળની અંદર લાગણીઓની ભીનાશ યથાવત્ છે. આ જ્ઞાન ઠોકીને પુરુષોને મહાન ચિતરવાનો પ્રયાસ અમે કરતાં નથી, પણ તમામ મર્દ જે `દર્દ` વેઠીને પણ સમાજમાં પરિવર્તન લાવવા માટે મથી રહ્યાં છે તેમની વાર્તા તમારા સુધી પહોંચાડવાના નમ્ર પ્રયાસરૂપે ગુજરાતી મિડ-ડે ડૉટ કૉમ લઈને આવ્યું છે એક વિશેષ સિરીઝ ‘મૅન્ટાસ્ટિક’. આ સિરીઝમાં આપણે દર પખવાડિયે મળીશું એવા પુરુષોને જેમણે તનતોડ મહેનત કરી કંઈક નવું ઉકાળ્યું હોય. તો આજે આપણે મળીશું ભાવેશ પંડ્યાને. આવતીકાલે દેશભરમાં ચિલ્ડ્રન્સ ડે ઊજવાશે ત્યારે આજે આપણે ખરા અર્થમાં આદિવાસી બાળકો માટે અને પ્રાથમિક શિક્ષણ ક્ષેત્રે જેણે અમૂલ્ય પ્રદાન કર્યું છે તેવા ભાવેશભાઈ વિષે વાતો કરીશું. ખાસ તો આદિવાસી બાળકોના શિક્ષણ માટે તેઓએ કરેલ કામગીરી પ્રશંસનીય છે. તેઓ છેલ્લા પચ્ચીસથી પણ વધારે વર્ષથી બનાસકાંઠા જિલ્લામાં શિક્ષણ ક્ષેત્ર સાથે સંકળાયેલા છે.
13 November, 2024 10:01 IST | Banaskantha | Dharmik Parmar
