‘મિડ-ડે ટૉપર્સ સન્માન સમારંભ’માં મહાનુભવોએ આપી શું સલાહ? જાણો અહીં…

૨૮ ઑગસ્ટની રવિવારની સવાર મુંબઈના હોનહાર ગુજરાતી તારલાઓ માટે યાદગાર સંભારણા સમાન બની ગઈ હતી. ટેન્થના ટૉપર્સ, ટ્વેલ્થના કૉલેજ ટૉપર્સ, વધતી ઉંમરને માત્ર આંકડો ગણીને બોર્ડની એક્ઝામ પાસ કરનાર તથા શારીરિક અક્ષમતા સામે ઝઝૂમીને પરીક્ષામાં ઝળકેલા ગુજરાતી વિદ્યાર્થીઓનું બહુમાન કરવાનો અભૂતપૂર્વ ‘મિડ-ડે ટૉપર્સ સન્માન કાર્યક્રમ’ બૉમ્બે સ્ટૉક એક્સચેન્જના ધ ઇન્ટરનૅશનલ કન્વેન્શન હૉલમાં યોજાયો હતો. ગુજરાતી વિદ્યાર્થીઓનું સન્માન કરવાનો આ પ્રકારનો કાર્યક્રમ ‘મિડ-ડે’ દ્વારા ૨૦૧૮થી શરૂ થયો હતો, જેનું આ ત્રીજું વર્ષ હતું. કોરોનાને કારણે બે વર્ષ આ કાર્યક્રમને રદ કરવાની ફરજ પડી હતી.   આ કાર્યક્રમના ટાઇટલ સ્પૉન્સર રાજ કમ્પ્યુટર્સ ઍકૅડેમી તેમ જ પાવર્ડ બાય સ્પૉન્સર નેક્સ ન્યુઝ નેટવર્ક હતા. રાજ કમ્પ્યુટર્સ ઍકૅડેમીના ચૅરમૅન અને મૅનેજિંગ ડિરેક્ટર રાજેશ છેડાએ આ પ્રસંગે વિદ્યાર્થીઓને સફળતાના ત્રણ મંત્ર આપ્યા હતા, તો મીઠીબાઈ કૉલેજનાં પ્રિન્સિપાલ કૃતિકા દેસાઈએ ઉચ્ચ અભ્યાસ માટે વિદેશ જવા માગતા વિદ્યાર્થીઓએ કઈ વસ્તુનો ખ્યાલ રાખવો એની સલાહ આપી હતી. નાટ્યકાર પ્રવીણ સોલંકીએ માતૃભાષાના મહત્ત્વને દૃષ્ટાંત સાથે સમજાવ્યું હતું. અભિનેત્રી જયકા યા​જ્ઞિક અને નાટ્ય દિગ્દર્શક મનોજ શાહે પણ વિદ્યાર્થીઓને સંબોધ્યા હતા. કોણ શું-શું બોલ્યું એના પર એક નજર...