જ્યાફતઃ 55 વર્ષથી વડોદરાના મનમોહન સમોસાનો સ્વાદ લોકોની દાઢે વળગ્યો છે

વડોદરા શહેર, જેને સંસ્કાર નગરી અને રાજ્યની કલાની રાજધાની તરીકે ઓળખવામાં આવે છે, ગુજરાતના સૌથી સુંદર અને સાંસ્કૃતિક શહેરોમાંનું એક છે. આ શહેર તેના ઐતિહાસિક સ્થાનો જેવાં કે લક્ષ્મી વિલાસ પેલેસ, કિર્તી મંદીર, અને મકરપુરા પેલેસ જેવી હેરીટેજ બિલ્ડિંગ્સ અને સુંદર બાગ બગીચાઓ અને કલા-સંસ્કૃતિ માટે જાણીતું હોવાના લીધે પ્રવાસીઓ અને સ્થાનિક લોકોને આકર્ષે છે. આ ઉપરાંત, શહેરનું ફૂડ કલ્ચર પણ મજાનું છે. અહીંના પ્રખ્યાત ફાસ્ટ ફૂડ જોઈન્ટમાંથી એક એટલે કે મનમોહનના સમોસા.  ગુજરાતમાં રેસ્ટોરન્ટ્સ અને સ્ટ્રીટ ફુડ વિશે લખનારાઓમાં પૂજા સાંગાણીનું નામ જાણીતું છે. મિડ-ડે અખબારમાં લગલગાટ બે વર્ષ સુધી ખાઇ પીને મોજ નામની કોલમથી તેઓએ ગુજરાતી ફુડને સ્વાદ રસિયાઓ સમક્ષ રજૂ કર્યું ત્યારે હવે તેઓ ડિજિટલી સ્વાદની "જ્યાફત" આપણી સાથે શૅર કરશે. ફૂડી પૂજા ગાંધીનગરમાં જન્મ્યાં અને વડોદરામાં ઉછર્યાં. અંગ્રેજી સાહિત્યમાં માર્સ્ટર્સ કરનારા પૂજા ગુજરાતી અને અંગ્રેજી બંન્ને ભાષામાં કોન્ટેન્ટ રાઇટિંગ કરતાં આવ્યા છે. તે ફૂડ રાઇટર જ નહીં પણ ફૂડ બ્લોગર પણ છે અને સોશ્યલ મીડિયા સ્ટ્રેટેજિસ્ટ તરીકે પણ કામ કરે છે. ફૂડ બ્લોગર, ફૂડ લેખિકા અને સોશિયલ મીડિયા સ્ટ્રેટેજિસ્ટ તરીકે પોતાના અનુભવનો લોકોને લાભ આપે છે. તેઓ સોશ્યલ મીડિયા પર પણ પોતાના લખાણો મુકે છે તથા તેમના કામને પગલે બે એવોર્ડ પણ તેઓ મેળવી ચૂક્યાં છે. નવા રેસ્ટરન્ટ્સ ખૂલે કે કોઇ નવો ફૂડ ટ્રેન્ડ હોય તે અચૂક ત્યાં પહોંચે અને સ્વાદ રસિકોને માર્ગદર્શન પણ આપતા રહે છે. ચાલો માણીએ જ્યાફત. (તસવીરો – પૂજા સાંગાણી)