જ્યાફતઃ મધ્યપૂર્વના તૂર્કી દેશની પ્રચલિત વાનગીઓ હવે અમદાવાદમાં પણ પૉપ્યુલર

મિત્રો ટેકનોલોજીની ક્રાંતિ સાથે દુનિયાના દેશોનું અંતર ઢૂંકડું થઇ ગયું છે અને એક દેશની સંસ્કૃતિ બીજા દેશમાં પ્રવેશે તેમાં ખાણી પીણી ટોચના સ્થાને આવે છે. વિમાન ભાડા ઘટ્યા હોવાથી અને લોકોની ખર્ચ કરવાની ક્ષમતા વધી હોવાથી વિદેશ પ્રવાસનું ચલણ વધી જતા પ્રવાસીઓ ત્યાં જઇને જાત-જાતના ખાન-પાન સાથે પરિચિત થાય છે અને ત્યાંથી આપણા દેશમાં પણ લઇને આવે. ગુજરાતીઓના ટોચના પ્રવાસ લિસ્ટમાં મધ્ય પૂર્વ અને યુરોપ વચ્ચે આવેલો દેશ તૂર્કી અથવા તો ટર્કી પસંદગીનું સ્થળ છે. અહીંની મીઠાઇઓ સ્વાદ લોકોને દાઢે વળગ્યો છે. આ દેશની મિઠાઇમાં હોટ ફેવરીટ હોય તો તે છે બકલાવા અને કુનાફા. અમદાવાદના એક પરિવારે ઘરે બકલાવા બનાવાની શરૂઆત કરી હતી અને આજે હવે તેઓએ શહેરમાં પ્રાઇમ લૉકેશનો ઉપર બે દુકાનો શરૂ કરી દઇને અમદાવાદીઓને ટર્કીશ મિઠાઇઓનું ઘેલું લગાડ્યું છે.     ગુજરાતમાં રેસ્ટોરન્ટ્સ અને સ્ટ્રીટ ફુડ વિશે લખનારાઓમાં પૂજા સાંગાણીનું નામ જાણીતું છે. મિડ ડે અખબારમાં લગલગાટ બે વર્ષ સુધી  ‘ખાઇ પીને મોજ’ નામની કોલમથી તેઓએ ગુજરાતી ફુડને સ્વાદ રસિયાઓ સમક્ષ રજૂ કર્યું ત્યારે હવે તેઓ ડિજિટલી સ્વાદની "જ્યાફત" આપણી સાથે શૅર કરશે. ફૂડી પૂજા ગાંધીનગરમાં જન્મ્યાં અને વડોદરામાં ઉછર્યાં. અંગ્રેજી સાહિત્યમાં માર્સ્ટર્સ કરનારા પૂજા ગુજરાતી અને અંગ્રેજી બંન્ને ભાષામાં કોન્ટેન્ટ રાઇટિંગ કરતાં આવ્યા છે. તે ફૂડ રાઇટર જ નહીં પણ ફૂડ બ્લોગર પણ છે અને સોશ્યલ મીડિયા સ્ટ્રેટેજિસ્ટ તરીકે પણ કામ કરે છે. ફૂડ બ્લોગર, ફૂડ લેખિકા અને સોશિયલ મિડીયા સ્ટ્રેટેજીસ્ટ તરીકે પોતાના અનુભવનો લોકોને લાભ આપે છે. તેઓ સોશ્યલ મીડિયા પર પણ પોતાના લખાણો મુકે છે તથા તેમના કામને પગલે બે એવોર્ડ પણ તેઓ મેળવી ચૂક્યાં છે. નવા રેસ્ટરન્ટ્સ ખૂલે કે કોઇ નવો ફૂડ ટ્રેન્ડ હોય તે અચૂક ત્યાં પહોંચે અને સ્વાદ રસિકોને માર્ગદર્શન પણ આપતા રહે છે. ચાલો માણીએ જ્યાફત. (તસવીરો - પૂજા સાંગાણી)