કવિવાર: જેના શબ્દો સમાજ માટે બની રહ્યા `માસ્તરની સોટી` - કવિ દલપતરામ

સમાજ સુધારા માટે પોતાની કલમનાં શસ્ત્ર વડે જે લડે તે કવિ. એવા કવિઓમાં દલપતરામ આવે. સૌરાષ્ટ્રના વઢવાણમાં જન્મેલા આ કવિએ બાપાની પીંપરથી શરૂ કરેલી સર્જન યાત્રા અનેક સંગ્રહો અને ગ્રંથો સુધી વિસ્તરીને આજે ગુર્જર ભાષાને મ્હેંકાવી રહી છે. સ્વામીનારાયણ સંપ્રદાયની તેમના જીવન પર ઊંડી અસર જોવા મળે છે. `સત્સંગના કવિ` તરીકેનું બિરુદ પણ તેમને મળેલું છે. તેમણે પોતે જ કહ્યું છે કે મારી કવિતાઓ પત્રપુષ્પવાળી શ્રીમાળી તણી છાબ છે` આવો આ છાબમાંથી કશુંક ચૂંટીને સૂંઘવાનો પ્રયાસ કરીએ. ‘ગુજરાતી ભાષા મરી પરવારી છે’ ‘ગુજરાતી ભાષા વેન્ટિલેટર પર છે’ આવાં વાક્યો તમે સાંભળ્યા હશે. કદાચ તમે પણ આવું જ વિચારતાં હશો. પરંતુ ગુજરાતી ભાષા કેટલાય કવિ-લેખક-પત્રકારોના ખોળે રમી-રમીને ઊછરી છે અને આવી સમૃદ્ધ ભાષા બળાપાનો ભોગ નથી બનતી. આપણે જીવ બાળવાને બદલે ભાષાના વારસાનો દીવો કરી તેનો મનમાં અને હૈયામાં ઉજાસ કરીએ. ગુજરાતી કવિતાઓનો રસાસ્વાદ આવો જ એક પ્રયાસ છે, જેનાં થકી આવી મહામૂલી ભાષાની ઉત્તમ રચનાઓ અને તેના સર્જકોને ફરી જીવીએ, ફરી મમળાવીએ. આ કવિતાના શબ્દોની પાંખે બેસી કોઇ નવા બ્રહ્માંડની સફર કરી શકાય એ માટે ગુજરાતી મિડ-ડે ડૉટ કૉમ આપની માટે ગુર્જર ભાષાનાં જાણીતાં કવિઓનાં જીવન-કવન અને કવિતાઓ લઈને આવ્યું છે આ ‘કવિવાર’માં. આવો સાથે મળી દર બીજા અને ચોથા મંગળવારે ‘કવિવાર’ ઉજવીએ.