કવિવાર: જેની આસપાસ ફર્યા કરે છે શબ્દોનું ચોમાસુ - કવિ તુષાર શુક્લ

‘ગુજરાતી ભાષા મરી પરવારી છે’ ‘ગુજરાતી ભાષા વેન્ટિલેટર પર છે’ આવાં વાક્યો તમે સાંભળ્યા હશે. કદાચ તમે પણ આવું જ વિચારતાં હશો. પરંતુ ગુજરાતી ભાષા કેટલાય કવિ-લેખક-પત્રકારોના ખોળે રમી-રમીને ઊછરી છે અને આવી સમૃદ્ધ ભાષા બળાપાનો ભોગ નથી બનતી. આપણે જીવ બાળવાને બદલે ભાષાના વારસાનો દીવો કરી તેનો મનમાં અને હૈયામાં ઉજાસ કરીએ. ગુજરાતી કવિતાઓનો રસાસ્વાદ આવો જ એક પ્રયાસ છે, જેનાં થકી આવી મહામૂલી ભાષાની ઉત્તમ રચનાઓ અને તેના સર્જકોને ફરી જીવીએ, ફરી મમળાવીએ. આ કવિતાના શબ્દોની પાંખે બેસી કોઇ નવા બ્રહ્માંડની સફર કરી શકાય એ માટે ગુજરાતી મિડ-ડે ડૉટ કૉમ આપની માટે ગુર્જર ભાષાનાં જાણીતાં કવિઓનાં જીવન-કવન અને કવિતાઓ લઈને આવ્યું છે આ ‘કવિવાર’માં. આવો સાથે મળી દર બીજા અને ચોથા મંગળવારે ‘કવિવાર’ ઉજવીએ. તાજેતરમાં જ કેન્દ્ર સરકાર દ્વારા જે પદ્મ પુરસ્કારોની જાહેરાત કરવામાં આવી તેમાં તુષાર દુર્ગેશભાઈ શુક્લને સાહિત્ય અને શિક્ષણ માટે પદ્‍મશ્રીથી સન્માનિત કરાયા છે. સૌ પ્રથમ તો તુષારભાઈને હાર્દિક અભિનંદન. આજે કવિવારની આ મહેફિલને `તુષારવાર` તરીકે ઉજવીએ. મૂળ સુરેન્દ્રનગરના આ કવિનો જન્મ અમદાવાદમાં. અમદાવાદની સેન્ટ ઝેવીયર્સ કોલેજમાંથી એમ.એ. એલ.એલ.બી.ની પદવી લઈ કવિએ તો શબ્દ સાથે જ રંગત જમાવી છે. આમ તો, રેડિયોથી તુષારભાઈની યાત્રા આરંભાઈ હતી. `શાણાભાઈ – શકરાભાઈ`ના સફળ અને અદભૂત સંચાલનથી તેમની કારકિર્દી આગળ વધી આજે પદ્મશ્રી સુધી વિસ્તરી છે. આવો, તુષારભાઈની કેટલીક સદાબહાર રચનાઓ થકી વધુ ઓળખવાનો પ્રયાસ કરીએ.