ટમેટાં કેમ ગ્રાહકોને લાલ આંખ બતાવી રહ્યાં છે?

સમગ્ર દેશમાં ટમેટાંની કિંમતમાં વધારાની ચર્ચા થઈ રહી છે ત્યારે ગ્રાહકોની બાબતો વિભાગના સેક્રેટરી રોહિત કુમાર સિંહે કહ્યું હતું કે ‘ટમેટાંની કિંમતમાં ઓચિંતો થયેલો વધારો ટેમ્પરરી સીઝનલ પરિસ્થિતિ છે અને ટૂંક સમયમાં જ કિંમતમાં ઘટાડો થશે. આ ઝડપથી બગડી જાય એવી કૉમોડિટી છે. ઓચિંતો વરસાદ પડવાના કારણે અનેક વિસ્તારોમાં ટ્રાન્સપોર્ટેશનને અસર થઈ છે. આ ટેમ્પરરી સમસ્યા છે. દર વર્ષે આ સમયગાળામાં એમ થાય છે.’

આ કારણસર ટમેટાં અને શાકભાજીના ભાવમાં વધારો

૧) દેશના અનેક વિસ્તારમાં વરસાદના કારણે ટમેટાંના પાકને ખાસ્સું નુકસાન થયું છે.
૨) કર્ણાટકના કોલરમાં મંડીના અધિકારી સી. આર. શ્રીનાથે જણાવ્યું હતું કે ‘વાઇટ ફ્લાય’ રોગ ફેલાવાના કારણે ટમેટાંના પાકને ખૂબ નુકસાન થયું છે.
૩) આસામમાં આવેલા પૂરના કારણે શાકભાજીના પાકને ખૂબ જ નુકસાન થયું છે.
૪) મણિપુરમાં વંશીય હિંસાના કારણે સપ્લાય વ્યવસ્થા ખોરવાઈ જવાના કારણે પણ શાકભાજીના ભાવ વધ્યા છે.
૫) ‘બિપરજૉય’ તોફાનના કારણે થયેલા વરસાદથી ગુજરાત અને રાજસ્થાનમાં ટમેટાંના પાકને ખૂબ નુકસાન થયું છે.
૬) બિહાર અને પશ્ચિમ બંગાળમાં અત્યંત ગરમીના કારણે ટમેટાંના પાકને નુકસાન થયું છે.