સાઇબર-ખતરાઓ સામે લડવાની ભારતની તૈયારી વિશે હોમ-મિનિસ્ટર અમિત શાહે કહ્યું...
અમિત શાહે ગઈ કાલે દિલ્હીમાં ઇિન્ડયન સાઇબર ક્રાઇમ કોઑર્ડિનેશન સેન્ટરના પહેલા સ્થાપનાદિવસ નિમિત્તે એના લોગોનું અનાવરણ કર્યું હતું.
કેન્દ્રીય ગૃહપ્રધાન અમિત શાહે ગઈ કાલે જણાવ્યું હતું કે ‘સાઇબર-ખતરાઓ સામે લડવા માટે આગામી પાંચ વર્ષમાં ભારત પાસે પાંચ હજાર પ્રશિક્ષિત સાઇબર-કમાન્ડો તૈયાર હશે. આ એવા ઉચ્ચ શિક્ષિત પોલીસ-અધિકારીઓ હશે જેઓ દેશ પર થતા સાઇબર-હુમલાનો પળભરમાં જવાબ આપશે અને આવા ખતરાઓને રોકી શકશે. સાઇબર-સિક્યૉરિટી વિના દેશનો વિકાસ શક્ય નથી.’
ઇન્ડિયન સાઇબર ક્રાઇમ કોઑર્ડિનેશન સેન્ટર (I4C)ના પહેલા સ્થાપનાદિવસે અમિત શાહે સાઇબર ફ્રૉડ મિટિગેશન સેન્ટર (CFMC)ને દેશને સમર્પિત કર્યું હતું. ગૃહપ્રધાને સાઇબર-ક્રાઇમની તપાસ માટે જૉઇન્ટ સમન્વય પ્લૅટફૉર્મનું પણ અનાવરણ કર્યું હતું. આ સિવાય તેમણે સસ્પેક્ટ રજિસ્ટ્રીનું પણ ઉદ્ઘાટન કર્યું હતું, જેમાં સાઇબર અને ઑનલાઇન ફાઇનૅન્શિયલ ફ્રૉડ કરનારા અપરાધીઓની વિગતો સ્ટોર કરવામાં આવી છે અને વિવિધ રાજ્યો અને કેન્દ્રશાસિત પ્રદેશો એ જોઈ શકે છે. નૅશનલ સાઇબર ક્રાઇમ રિપોર્ટિંગ પોર્ટલ (NCRP)ની જેમ જ આ રજિસ્ટ્રી તૈયાર કરવામાં આવી છે.
ADVERTISEMENT
CFMC વિશે બોલતાં અમિત શાહે કહ્યું હતું કે ‘I4C દ્વારા સ્થાપવામાં આવેલા આ સેન્ટરમાં મુખ્ય બૅન્કો, ફાઇનૅન્શિયલ ઇન્ટરમિડિયેટર્સ, પેમેન્ટ ઍગ્રિગેટર્સ, ટેલિકૉમ સર્વિસ પ્રોવાઇડર અને વિવિધ રાજ્યોની લૉ એન્ફોર્સમેન્ટ એજન્સીઓને સામેલ કરવામાં આવી છે. કોઈ પણ સાઇબર-ગુનામાં આ સરળતાથી તપાસ કરવામાં મદદરૂપ થશે.’
