આવું કહીને વિવાદ નોતરનારા વેસ્ટર્ન રેલવેના ટિકિટ કલેક્ટરને સસ્પેન્ડ કરી દેવાયો
આશિષ પાંડે
વેસ્ટર્ન રેલવેના મુંબઈ ડિવિઝનમાં કામ કરી રહેલા મૂળ ઉત્તર પ્રદેશના ટિકિટચેકર આશિષ પાંડેએ મરાઠી અને મુસ્લિમ સમુદાયો સાથે હું કોઈ વ્યવહાર ન કરું એવું કથિત નિવેદન કરીને મુંબઈમાં વિવાદ સરજ્યો છે. એને પરિણામે આશિષ પાંડેને મુંબઈ ડિવિઝનના ડિવિઝનલ રેલવે મૅનેજરે જ્યાં સુધી ઇન્ક્વાયરી પૂરી ન થાય ત્યાં સુધી સસ્પેન્ડ કરી દીધો છે.
હાલ વિક્રોલીમાં રહેતા આશિષ પાંડેની જે ઑડિયો-ક્લિપ વાઇરલ થઈ છે એમાં તે કહે છે કે હું ઉત્તર પ્રદેશનો છું, હું મુસ્લિમો અને મહારાષ્ટ્રિયનોને કોઈ ધંધો આપતો નથી; એ જ પ્રમાણે હું મુસ્લિમ કે પછી મહારાષ્ટ્રિયનની રિક્ષામાં પણ બેસતો નથી. જોકે સોશ્યલમીડિયામાં તેના આ વલણની વિરુદ્ધ કમેન્ટ્સનો વરસાદ થઈ રહ્યો છે. વેસ્ટર્ન રેલવેએ એની નોંધ લીધી છે એટલું જ નહીં, તેને હાલ સસ્પેન્ડ પણ કરી દેવામાં આવ્યો છે અને તેની સામે ઇન્ક્વાયરી બેસાડવામાં આવી છે.
ADVERTISEMENT
આશિષ પાંડેની વાઇરલ થયેલી ઑડિયો-ક્લિપને કારણે અનેક લોકોનાં ભવાં વંકાયાં છે. રવિવારે સાંજે ૫.૩૩ વાગ્યે એ સોશ્યલ મીડિયા પર મુકાઈ હતી. વેસ્ટર્ન રેલવેએ આ બાબતે તરત જ ઍક્શન લીધી હતી. ડિવિઝનલ રેલવે મૅનેજર, મુંબઈ સેન્ટ્રલ દ્વારા આ બાબતે વેસ્ટર્ન રેલવેના ઑફિશ્યલ X હૅન્ડલ પર માહિતી આપતાં કહેવાયું હતું કે ‘અમે આ બાબતને ગંભીરતાથી લીધી છે. અમારા કર્મચારી દ્વારા રિલિજિયસ કમ્યુનિટી અને મહારાષ્ટ્રિયનો સંદર્ભે કરાયેલી વાંધાજનક ટિપ્પણીને લઈને અમે તેને સસ્પેન્ડ કરી દીધો છે અને તેની સામે ઇન્ક્વાયરી ચાલુ કરવામાં આવી છે. આ બાબતની ઝીણવટભરી તપાસ કરવામાં આવશે. તપાસમાં જે બહાર આવશે એના આધારે તેની સામે પગલાં લેવામાં આવશે. લોકોને અમે જે સેવા પૂરી પાડી રહ્યા છીએ એ અવિરત ચાલુ રહેશે એની અમે ખાતરી આપીએ છીએ.’
મહારાષ્ટ્રમાં મરાઠી માણૂસના મુદ્દાનું સમર્થન કરતી રાજ ઠાકરેની પાર્ટી મહારાષ્ટ્ર નવનિર્માણ સેના (MNS)એ પણ આ બાબતે ઉગ્ર વલણ અપનાવ્યું છે. MNSના કાર્યકરોએ આશિષ પાંડેને
મળી તેમની આગવી સ્ટાઇલમાં તેને ચેતવણી આપીને ફરી આવું ન કરવા જણાવ્યું છે.
