વાતોમાં આવી જઈને ફરિયાદીએ દોઢ કરોડ રૂપિયા રોક્યા હતા
પ્રતીકાત્મક તસવીર
નવી મુંબઈ સાઇબર પોલીસ-સ્ટેશનમાં ક્રિપ્ટોકરન્સીમાં રોકાણ કરવા જતાં દોઢ કરોડ રૂપિયા ગુમાવવા બદલની ફરિયાદ નોંધાઈ છે. સાઇબર પોલીસે હવે એ ગઠિયાને શોધી કાઢવાના પ્રયાસ શરૂ કર્યા છે. ફરિયાદીએ જણાવ્યા મુજબ ગયા મહિને ગઠિયાએ તેનો ઑનલાઇન સંપર્ક કર્યો હતો અને કહ્યું હતું કે જો તે દોઢ કરોડ રૂપિયા ક્રિપ્ટો કરન્સીમાં ઇન્વેસ્ટ કરશે તો તેને થોડા સમયમાં ઘણો ફાયદો થશે. એથી તેની વાતોમાં આવી જઈને ફરિયાદીએ દોઢ કરોડ રૂપિયા રોક્યા હતા. એ પછી જ્યારે તેણે એ રોકાણ પર થયેલા ફાયદા વિશે આરોપીને પૂછપરછ કરી ત્યારે આરોપીએ તેને ઈ-મેઇલ પર ઉડાઉ જવાબ આપ્યા હતા, પણ રકમ પાછી આપી નહોતી. આખરે પોતાની સાથે છેતરપિંડી થઈ છે એવું જણાઈ આવતાં સાઇબર પોલીસ-સ્ટેશનમાં ફરિયાદ કરવામાં આવી છે. પોલીસ હવે તેણે કરેલું પેમેન્ટ કયા અકાઉન્ટમાં ગયું, ત્યાંથી કયા અકાઉન્ટમાં શિફ્ટ કરવામાં આવ્યું, ક્યાંથી એને ઉપાડવામાં આવ્યું એ બાબતની ટેક્નિકલ તપાસ ચાલુ કરી છે.
