Nana Patole Resigns: મહારાષ્ટ્ર વિધાનસભા ચૂંટણીમાં મહાવિકાસ આઘાડીની હાર બાદ નાના પટોલેએ મહારાષ્ટ્ર કોંગ્રેસના અધ્યક્ષ પદેથી રાજીનામું આપી દીધું હોવાની માહિતી સુત્રોએ આપી
નાના પટોલેની ફાઇલ તસવીર
મહારાષ્ટ્ર વિધાનસભા ચૂંટણી ૨૦૨૪ (Maharashtra Assembly Elections 2024)માં ઈન્ડિયા એલાયન્સ (I.N.D.I.A Alliance)ને કારમી હારનો સામનો કરવો પડ્યો છે. હાર બાદ કોંગ્રેસ (Congress) પક્ષમાં પણ રાજીનામાનો તબક્કો શરૂ થયો છે. પાર્ટીના પ્રદેશ અધ્યક્ષ નાના પટોલે (Nana Patole)એ પદ પરથી રાજીનામું (Nana Patole Resigns) આપી દીધું છે. ઉલ્લેખનીય છે કે કોંગ્રેસ પાર્ટીએ વિધાનસભા ચૂંટણીમાં માત્ર 16 સીટો પર જીત મેળવી હતી. સાથે જ મહાવિકાસ આઘાડી (Maha Vikas Aghadi)ને પણ મોટી હારનો સામનો કરવો પડ્યો હતો. મહારાષ્ટ્ર વિધાનસભામાં 101 બેઠકો પર ચૂંટણી લડનાર કોંગ્રેસને માત્ર 16 બેઠકો મળી અને 12.42 ટકા મત મળ્યા.
મહારાષ્ટ્ર કોંગ્રેસના પ્રદેશ અધ્યક્ષ નાના પટોલેએ રાજીનામું આપી દીધું હોવાના અહેવાલ છે.
ADVERTISEMENT
મહારાષ્ટ્ર વિધાનસભા ચૂંટણીમાં મહાવિકાસ આઘાડીની હાર બાદ નાના પટોલેએ મહારાષ્ટ્ર કોંગ્રેસના અધ્યક્ષ પદેથી રાજીનામું આપી દીધું છે. સૂત્રોના જણાવ્યા અનુસાર, પાર્ટી હાઈકમાન્ડે હજુ સુધી તેમનું રાજીનામું સ્વીકાર્યું નથી. પટોલેનું રાજીનામું એવા સમયે આવ્યું છે જ્યારે કોંગ્રેસ પાર્ટીએ મહારાષ્ટ્ર વિધાનસભા ચૂંટણીમાં અત્યાર સુધીનું સૌથી ખરાબ પ્રદર્શન કર્યું છે. મહારાષ્ટ્રમાં સત્તારૂઢ એનડીએએ કોંગ્રેસ પાર્ટી અને મહાવિકાસ અઘાડીને ચૂંટણીમાં કારમી હાર આપી છે.
કોંગ્રેસ પાર્ટીના ઉમેદવાર નાના પટોલે સાકોલી બેઠક પરથી 208 મતોના સૌથી ઓછા માર્જિનથી જીત્યા. સાકોલીમાં તેમની જીત આ વર્ષે સૌથી ઓછા માર્જિનથી જીતેલી ટોચની ત્રણ બેઠકોમાં સ્થાન ધરાવે છે. આ પરિણામો 2019ની વિધાનસભા ચૂંટણીથી તદ્દન વિપરીત છે, જ્યારે નાના પટોલેએ સાકોલીને લગભગ 8,000 મતોના જંગી માર્જિનથી જીતી હતી.
પ્રદેશ અધ્યક્ષ નાના પટોલેએ રવિવારે કહ્યું હતું કે, તેઓ સુનિશ્ચિત કરશે કે નવી ચૂંટાયેલી મહાયુતિ સરકાર તેના ચૂંટણી ઢંઢેરામાં અને ભાષણોમાં રાજ્યની જનતાને આપેલા વચનોને પૂર્ણ કરે. અહીં એક પ્રેસ કોન્ફરન્સને સંબોધતા કોંગ્રેસ નેતાએ કહ્યું હતું કે, મહાયુતિએ મુખ્યમંત્રી માઝી લડકી બહિન યોજના હેઠળ મહિલાઓ માટે માસિક ભથ્થું 1,500 રૂપિયાથી વધારીને 2,100 રૂપિયા કરવાનું વચન તાત્કાલિક પૂરું કરવું જોઈએ.
નોંધનીય છે કે, રાજ્યની વિધાનસભા ચૂંટણીમાં મહાયુતિએ 288માંથી 230 બેઠકો જીતી છે. મહાગઠબંધનમાં સામેલ ભાજપે 132 બેઠકો, શિવસેનાએ 57 બેઠકો અને રાષ્ટ્રવાદી કોંગ્રેસ પાર્ટી (NCP)એ 41 બેઠકો જીતી હતી. બીજી તરફ, એમવીએને કારમી હારનો સામનો કરવો પડ્યો, એકંદરે માત્ર 46 બેઠકો જીતી. MVA માં સમાવિષ્ટ રાષ્ટ્રવાદી કોંગ્રેસ પાર્ટી (શરદચંદ્ર પવાર) એ 10 બેઠકો, કોંગ્રેસ 16 અને શિવસેના (UBT) 20 બેઠકો જીતી હતી. પટોલે પોતે ભંડારા જિલ્લાના સાકોલી વિધાનસભા મતવિસ્તારમાંથી 208 મતોની સરસાઈથી જીત્યા હતા. પટોલેએ કહ્યું હતું કે, અમે સુનિશ્ચિત કરીશું કે મહાયુતિ સરકાર ચૂંટણી દરમિયાન ખેડૂતોને આપેલા તેના વચનો પૂર્ણ કરે.
