કુરાર પોલીસે ઘટનાસ્થળે જઈને સીસીટીવી ફુટેજ મેળવ્યાં હતાં
ઘરેણાં અને ગિફ્ટ-કવરની રિક્ષામાં ભુલાયેલી બૅગ પાછી મળી
કુરાર પોલીસે ૧૧ નવેમ્બરે એક મહિલાની બૅગમાં ૬ લાખ રૂપિયાનાં ઘરેણાં હતાં એ લઈને નાસી જનાર રિક્ષાવાળાને સીસીટીવી ફુટેજ અને ખબરી નેટવર્કની મદદથી આખરે ઝડપી લીધો હતો.
આ ઘટનાનો ભોગ બનેલી સોનલ ભોસલે ઘટનાના દિવસે બોરીવલી-ઈસ્ટના નૅશનલ પાર્કથી પોતાનાં બે બાળકો સાથે મલાડ-ઈસ્ટના લક્ષ્મીનગર આવવા નીકળી હતી. જ્યારે તેઓ લક્ષ્મીનગર પહોંચ્યાં ત્યારે વરસાદ પડી રહ્યો હતો એટલે તેમને ઊતરતાં થોડી વાર લાગી હતી. તેઓ રિક્ષામાંથી ઊતરીને પોતાની બૅગ લે એ પહેલાં જ ૪૧ વર્ષનો રિક્ષાવાળો શિવપ્રસાદ યાદવ તેની રિક્ષા ભગાવી ગયો હતો. સોનલ ભોસલેની એ બૅગમાં ૧૨ તોલા સોનાના ૬ લાખ રૂપિયાનાં ઘરેણાં હતાં. આ બધું એટલું ઝડપથી બની ગયું કે સોનલ ભોસલે એ રિક્ષાનો નંબર ન લઈ શકી. ત્યાર બાદ તેણે ઘરે આવીને પરિવારમાં એ વિશે વાત કરી અને આખરે બે દિવસ પછી તેણે આ બાબતે કુરાર પોલીસ-સ્ટેશનમાં ફરિયાદ નોંધાવી હતી. કુરાર પોલીસે ઘટનાસ્થળે જઈને સીસીટીવી ફુટેજ મેળવ્યાં હતાં. ત્યાર બાદ એ રિક્ષા આગળ ક્યાં-ક્યાં ગઈ એને આધારે તેમ જ આ બાબત ખબરી-નેટવર્કમાં પણ સર્ક્યુલેટ કરીને આખરે રિક્ષાવાળા શિવપ્રસાદ યાદવને ઝડપી લીધો હતો અને તેની પાસેથી ચોરાયેલાં એ તમામ ઘરેણાં પાછાં મેળવ્યાં હતાં.
ADVERTISEMENT
ઘરેણાં અને ગિફ્ટ-કવરની રિક્ષામાં ભુલાયેલી બૅગ પાછી મળી
દહિસર-વેસ્ટના નવાગાંવ વિસ્તારમાં રહેતા ૭૦ વર્ષના ભારત ભૂષણ આર્ટે ૬ ડિસેમ્બરે મધરાત બાદ તેમના દીકરીનાં લગ્ન પતાવી દહિસર-ઈસ્ટના વૈશાલીનગરથી ઘરે આવ્યા હતા અને લગ્નનાં ઘરેણાં અને ગિફ્ટમાં લોકોએ આપેલાં કવર મળીને કુલ ૮ લાખ રૂપિયાની માલમતા ભરેલી બૅગ રિક્ષામાં જ ભૂલીને ઘરે આવી ગયા હતા. ત્યાર બાદ તેમને જાણ થઈ કે બૅગ તો રિક્ષામાં જ રહી ગઈ. એટલે તેમણે તરત જ આ બાબતે એમએચબી પોલીસનો સંપર્ક કરીને મદદ માગી હતી. એમએચબી પોલીસ-સ્ટેશનના અધિકારીઓએ સીસીટીવી ફુટેજની મદદથી એ રિક્ષાને ઓળખી કાઢી હતી અને એ રિક્ષાને બોરીવલી-વેસ્ટથી દહિસર-ચેકનાકા સુધી ટ્રેક કરીને આખરે એક જ કલાકમાં એ રિક્ષાવાળા પાસેથી એ બૅગ મેળવીને ભારત ભૂષણ આર્ટેને સોંપી હતી. ઘરેણાં અને રકમ પોલીસે પાછાં મેળવી આપતાં આર્ટે પરિવારમા આનંદ છવાઈ ગયો હતો અને તેમણે પોલીસનો આભાર માન્યો હતો.
