સાંસદ નવનીત રાણાને હોસ્પિટલમાંથી રજા મળી, ઉદ્ધવ ઠાકરેને ફેંક્યો ખુલ્લો પડકાર

બહાર નીકળતી વખતે નવનીતના હાથમાં હનુમાન ચાલીસા જોવા મળી

ફાઇલ તસવીર

અમરાવતીના સાંસદ નવનીત રાણાને આજે લીલાવતી હોસ્પિટલમાંથી રજા આપવામાં આવી હતી. હોસ્પિટલમાંથી બહાર નીકળતી વખતે નવનીતના હાથમાં હનુમાન ચાલીસા જોવા મળી હતી. એટલું જ નહીં, નવનીત રાણાના સ્વાગત માટે કેટલાક સમર્થકો હોસ્પિટલની બહાર હાજર હતા. સમર્થકો દ્વારા સાંસદ નવનીત રાણા અને ધારાસભ્ય રવિ રાણાને હનુમાનની મૂર્તિ અર્પણ કરવામાં આવી હતી. તેમ જ નવનીત રાણાનું સમર્થકો દ્વારા રામના નામની શાલ ઓઢાડી સ્વાગત કરવામાં આવ્યું હતું. તેમણે મીડિયા સાથે પણ વાતચીત કરી હતી. નવનીત રાણાએ મુખ્યપ્રધાન ઉદ્ધવ ઠાકરેને ખુલ્લો પડકાર આપ્યો છે.

“મેં શું ભૂલ કરી છે? ભગવાન રામનું નામ લેવું, હનુમાનનું નામ લેવું એ ખોટું છે, તો 14 દિવસ શું? હું 14 વર્ષની સજા ભોગવવા તૈયાર છું. 14 દિવસ જેલમાં રહીએ તો પણ શું? વર્ષો, તમે મારો અવાજ દબાવી શકશો નહીં.” તેમ નવનીત રાણાએ કહ્યું હતું. નવનીત રાણાએ કહ્યું છે કે તેઓ મહાવિકાસ આઘાડીમાં સત્તાના દુરુપયોગ અંગે દિલ્હીમાં વડાપ્રધાન અને ગૃહપ્રધાનને ફરિયાદ કરશે.

ADVERTISEMENT

તેમણે એમ પણ કહ્યું કે તે દિલ્હી જઈને સંજય રાઉત વિરુદ્ધ ફરિયાદ નોંધાવશે. તેમણે મુખ્યપ્રધાન ઉદ્ધવ ઠાકરેને પણ સીધો પડકાર ફેંક્યો હતો. રાણાએ કહ્યું છે કે મહારાષ્ટ્રમાં કોઈપણ મતવિસ્તારમાં ચૂંટણી લડવી જોઈએ, હું તેમની સામે ચૂંટણી લડીશ. એટલું જ નહીં નવનીત રાણાએ કહ્યું છે કે મુંબઈ મહાનગર પાલિકા ચૂંટણી પ્રચારમાં શિવસેના વિરુદ્ધ પ્રચાર કરશે.”