ગુજરાતના માર્ગે કૅન્સર આવી રહ્યું છે મહારાષ્ટ્રમાં

કૉન્ગ્રેસના વરિષ્ઠ નેતાએ ગુટકા વિશે વિધાનસભામાં કર્યો ગંભીર આરોપ

વિજય વડેટ્ટીવાર

કૉન્ગ્રેસના વરિષ્ઠ નેતા વિજય વડેટ્ટીવારે ગઈ કાલે વિધાનસભામાં ગંભીર આરોપ કરતાં કહ્યું હતું કે મહારાષ્ટ્રમાં ગુટકા પર પ્રતિબંધ હોવા છતાં ગુજરાતમાંથી એની મહારાષ્ટ્રમાં તસ્કરી કરવામાં આવે છે અને એની પાછળ અનેક નેતાઓનો હાથ છે.

તેમણે સરકાર પાસે એવી માગણી કરી હતી કે કાં તો ગુજરાતમાંથી આવનારો ગુટકા બંધ કરાવો અથવા તો મહારાષ્ટ્રમાંથી ગુટકા પરનો પ્રતિબંધ દૂર કરી દો. તેમની આ માગણીનો ભારતીય જનતા પાર્ટી (BJP)ના વિધાનસભ્ય અમિત સાટમે જોરદાર વિરોધ કર્યો હતો.

ADVERTISEMENT

વિજય વડેટ્ટીવારે કહ્યું હતું કે ‘ગુજરાતના માર્ગે મહારાષ્ટ્રમાં કૅન્સર આવી રહ્યું છે. રાજ્યના કોઈ પણ ગામ કે શહેરમાં તમે જાઓ, પાનપટ્ટીની દુકાનોમાં તમને ગુટકા વેચાતા જોવા મળશે. મહારાષ્ટ્રમાં પ્રતિબંધ હોવા છતાં ખુલ્લેઆમ ગુટકા વેચાય છે. કોના આશીર્વાદને લીધે આ રૅકેટ ચાલુ છે? મહારાષ્ટ્રના નાગરિકોના આરોગ્યને જોખમમાં નાખનારી આ ટોળીને કોનું સંરક્ષણ મળી રહ્યું છે? આ બિનજામીનપાત્ર ગુનો હોવા છતાં આરોપીઓ છૂટી જતા હોવાથી સરકાર કાયદામાં ફેરબદલ કરવાની છે કે નહીં?’

ગુટકા પરનો પ્રતિબંધ દૂર કરવાની વિજય વડેટ્ટીવારે જે માગણી કરી છે એનો વિરોધ કરતાં અમિત સાટમે કહ્યું હતું કે આ ડિમાન્ડ તો ગુટકા-લૉબીને મદદ કરવા સમાન છે.