મુંબઈની ઍર ક્વૉલિટીની ફરિયાદ બીએમસીને ઍપ દ્વારા કરી શકાશે

ફોટો શૅર કરી શકે અને ફરિયાદ પણ કરી શકે

પ્રતીકાત્મક તસવીર

મુંબઈની કથળતી જતી ઍર ક્વૉલિટીને લઈને કરાયેલી જનહિતની એક અરજી સંદર્ભે બૉમ્બે હાઈ કોર્ટે બીએમસીને એવો નિર્દેશ આપ્યો હતો કે ખરાબ ઍર ક્વૉલિટીની ફરિયાદ કરી શકાય એ માટે બીએમસી એક વેબ પૉર્ટલ, ઍપ્લિકેશન વિકસાવે જેથી કોઈ પણ મુંબઈગરો તેના વિસ્તારની ઍર ક્વૉલિટી બાબતે એના પર માહિતી મૂકી શકે, ફોટો શૅર કરી શકે અને ફરિયાદ પણ કરી શકે. હાઈ કોર્ટના એ આદેશના પગલે બીએમસીએ હવે Mumbai Air (મુંબઈ ઍર) ઍપ્લિકેશન તૈયાર કરી છે જે હાલ ઍન્ડ્રૉઇડ ફોન પર ડાઉનલોડ કરી શકાય છે. ટૂંક સમયમાં અન્ય ઑપરેટિંગ પ્લૅટફૉર્મ પર પણ એ ઉપલબ્ધ થઈ શકશે.  

કોર્ટના નિર્દેશને ગંભીરતાથી લઈને બીએમસીના પર્યાવરણ વિભાગે લોકો સરળતાથી વાપરી શકે એવી ઍપ્લિકેશન તૈયાર કરી છે. મોબાઇલ ઍપ્લિકેશનથી ફરિયાદ કરી શકાશે અને બીએમસી દ્વારા એ ફરિયાદનું નિરાકારણ કરવા ડૅશ બોર્ડ પણ બનાવાયું હોવાની માહિતી પર્યાવરણ વિભાગના ઇન્ફર્મેશન કમિશનર મનીષ પિંપળેએ આપી છે.
ફરિયાદ કરતી વખતે ફરિયાદનું સ્વરૂપ, ફરિયાદની વિગતો, લોકેશન, રસ્તાનું નામ, વિભાગનું નામ, ફોટો એ બધું જ આપવાનું રહેશે. એટલું જ નહીં, ફરિયાદ કર્યા બાદ એના પર શું પગલાં લેવાયાં એ પણ ઍપ પર જોઈ શકાશે.