બીચ પર ઇડલી-સાંભાર વેચાતાં હોવાથી ટૂરિસ્ટોની સંખ્યા ઘટતી જઈ રહી છે

ગોવાના BJPના વિધાનસભ્યનો વિચિત્ર દાવો

પ્રતીકાત્મક AI તસવીર

ભારતીય જનતા પાર્ટી (BJP)ના વિધાનસભ્ય માઇકલ લોબોએ ગઈ કાલે એવો દાવો કર્યો હતો કે ગોવાના બીચ પર ઇડલી-સાંભાર અને વડાપાંઉ વેચાઈ રહ્યાં હોવાથી ઇન્ટરનૅશનલ ટૂરિસ્ટો ઘટી ગયા છે. ટૂરિસ્ટોની સંખ્યા ઘટી રહી હોવાના મુદ્દે કલંગુટ બીચ પર પ્રેસ-કૉન્ફરન્સમાં બોલતાં લોબોએ કહ્યું હતું કે ટૂરિસ્ટોની સંખ્યા ઘટવા માટે માત્ર સરકારને જ દોષી ન ગણી શકાય, તમામ સ્ટેકહોલ્ડર્સ સાથે આ મુદ્દે વાત કરવામાં આવવી જોઈએ.

પોતાની વાતના મુદ્દે આગળ વધતાં લોબોએ કહ્યું હતું કે ‘સ્થાનિક લોકો બૅન્ગલોરના લોકોને બીચ પરની તેમની જગ્યાઓ ભાડે આપે છે અને ત્યાં ઇડલી-સાંભાર અને વડાપાંઉ વેચવામાં આવી રહ્યાં છે. આનાથી બે વર્ષથી ટૂરિસ્ટો ઓછા થયા છે. સરકારે ટૂરિસ્ટો ફરી કેવી રીતે વધે એ માટે વિચારણા કરવાની જરૂર છે. તેમણે વધુમાં કહ્યું હતું કે રશિયા અને યુક્રેન વચ્ચે યુદ્ધના કારણે પણ આ દેશોમાંથી આવતા ટૂરિસ્ટોની સંખ્યા ઘટી છે.