ક્રાઇમ બ્રાન્ચે ત્રણ લોકો પાસેથી આઠ પિસ્ટલ અને ૧૩૮ બુલેટ જપ્ત કરી
જપ્ત કરાયેલ સામગ્રી અને તપાસ ટીમ
મુંબઈ પોલીસની ક્રાઇમ બ્રાન્ચના બાંદરા યુનિટના સિનિયર પોલીસ-ઇન્સ્પેક્ટર અને એન્કાઉન્ટર સ્પેશ્યલિસ્ટ દયા નાયક અને તેમની ટીમે તપાસ કરીને રવિવારે જુહુમાંથી ત્રણ આરોપીઓને આઠ આધુનિક પિસ્ટલ અને ૧૩૮ બુલેટ સાથે ઝડપી લીધા હતા.
દયા નાયકને ઇન્ફૉર્મર દ્વારા માહિતી મળી હતી કે કોઈ વ્યક્તિ જુહુતારા રોડ પર PVR સિનેમા પાસે ગન અને બુલેટ લઈને આવવાની છે. એથી દયા નાયકે તેમની ટીમ સાથે વૉચ ગોઠવી એક આરોપીને રોકીને તેની પૂછપરછ કરી હતી. તેની ઝડતી લેતાં તેની પાસેથી સ્ટેનલેસ સ્ટીલની એક દેશી પિસ્ટલ અને સાત બુલેટ મળી આવી હતી. ત્યાર બાદ વધુ તપાસ કરતાં બીજી પાંચ આધુનિક પિસ્ટલ અને ૧૨૧ બુલેટ તેની પાસેથી મળી હતી. ત્યાર બાદની પૂછપરછમાં તેણે પોતાના બે સાગરીતોની માહિતી આપતાં તેમની પાસેથી એક-એક પિસ્ટલ અને ૧૦ બુલેટ પોલીસે જપ્ત કરી હતી. આમ ત્રણે આરોપીઓ પાસેથી કુલ મળીને આઠ પિસ્ટલ અને ૧૩૮ બુલેટ મળી આવી હતી. આટલા મોટા પ્રમાણમાં ફાયરઆર્મ્સ મળી આવતાં પોલીસ પણ ચોંકી ઊઠી હતી કે આ ફાયરઆર્મ્સ વેચાવા માટે આવ્યાં હતાં કે તેઓ કોઈ મોટી ખાનાખરાબી કરવા માગતા હતા? આ સંદર્ભે જુહુ પોલીસ-સ્ટેશનમાં ગુનો નોંધાયો છે. આ બાબતની વધુ તપાસ ચાલી રહી છે. ત્રણે આરોપીઓને કોર્ટમાં હાજર કરતાં કોર્ટે તેમને ૮ જુલાઈ સુધીની પોલીસ-કસ્ટડી આપી છે.
![Join Whatsapp Channel Whatsapp-channel](https://www.gujaratimidday.com/assets/images/whatsapp-desk-modified.png)
![Join Whatsapp Channel Whatsapp-channel](https://www.gujaratimidday.com/assets/images/whatsapp-mobile.png)