અમદાવાદ મ્યુનિસિપલ કમિશનરે વર્ષ ૨૦૨૩-’૨૪ માટે ૮૪૦૦ કરોડ રૂપિયાનું ડ્રાફ્ટ-બજેટ રજૂ કર્યું, અમદાવાદીઓના ખિસ્સામાંથી અંદાજે ૬૦ કરોડ રૂપિયાનો નવો ટૅક્સ વસૂલાશે
પ્રતીકાત્મક તસવીર (સૌજન્ય આઇસ્ટૉક)
અમદાવાદઃ સુરતની પેટર્ન પ્રમાણે અમદાવાદમાં પહેલી વાર એન્વાયરમેન્ટ ઇમ્પ્રૂવમેન્ટ ચાર્જિસ વસૂલવા માટે અમદાવાદ મ્યુનિસિપલ કમિશનર દ્વારા ગઈ કાલે રજૂ કરેલા ડ્રાફ્ટ-બજેટમાં દરખાસ્ત કરવામાં આવી છે. આ નવા ટૅક્સ દ્વારા શહેરીજનો પાસેથી ૬૦ કરોડ રૂપિયા વસૂલવાનો અંદાજ છે.
અમદાવાદ મ્યુનિસિપલ કમિશનર એમ. થેન્નારસને વર્ષ ૨૦૨૩-૨૪ માટે ૮,૪૦૦ કરોડ રૂપિયાનું ડ્રાફ્ટ-બજેટ રજૂ કર્યું હતું, જેમાં ૧૦ વર્ષ બાદ વેરામાં વધારાની દરખાસ્ત રજૂ કરવામાં આવી છે. બજેટમાં સુરતની જેમ એક નવા પ્રકારનો ટૅક્સ વસૂલવા માટે આયોજન હાથ ધરાયું છે. મ્યુનિસિપલ કમિશનર એમ. થેન્નારસને આ નવા ટૅક્સની વિગતો આપતાં કહ્યું હતું કે ‘પોલ્યુટર પે પ્રિન્સિપાલના ધોરણે અર્બન ટ્રાન્સપોર્ટનો ઉપયોગ નહી કરતાં જે શહેરીજનો પોતાનાં વાહનો વાપરે છે એનાથી પોલ્યુશનમાં વધારો થતો હોવાથી એન્વાયર્નમેન્ટ ઇમ્પ્રૂવમેન્ટ ચાર્જિસ દાખલ કરીને આ ચાર્જથી પોલ્યુશન ઘટાડવાના આયોજનથી ગાર્ડન બનાવવામાં આવશે તેમ જ અર્બન ટ્રાન્સપોર્ટને મજબૂત કરવામાં આવશે. રહેઠાણ તથા બિન રહેઠાણની મિલકતોમાં મિલકતના ક્ષેત્રફળને ધ્યાનમાં રાખીને રહેઠાણની મિલકતોમાં વાર્ષિક ૫થી ૩ હજાર રૂપિયા અને બિનરહેઠાણની મિલકતોમાં વાર્ષિક ૧૫૦થી ૭ હજાર રૂપિયા સુધીની રકમ એન્વાયર્નમેન્ટ ઇમ્પ્રૂવમેન્ટ ચાર્જિસ તરીકે સૂચવવામાં આવી છે. આમાંથી ૬૦ કરોડ રૂપિયા મળવાની આશા છે. સુરતમાં ૨૦૧૮થી એન્વાયર્નમેન્ટ ઇમ્પ્રૂવમેન્ટ ચાર્જિસ લેવામાં આવે છે.’
