એકતા કપૂર જેવી નિષ્ઠાવાન વ્યક્તિએ મારા પર ભરોસો મૂકયો એથી હું ૧૦૦ ટકા સમર્પણ આપીશ
શાલીન ભનોત
શાલીન ભનોતનું કહેવું છે કે સિરિયલ ‘બેકાબૂ’ની સ્ટોરી હટકે છે અને એવી સ્ટોરી મેં કદી જોઈ નથી. શાલીને ‘બિગ બૉસ 16’માં ભાગ લીધો હતો. તે હવે કલર્સ પર આવતા એકતા કપૂરના શો ‘બેકાબૂ’માં ઈશા સિંહ અને મોનાલિસા સાથે જોવા મળી રહ્યો છે. આ શોમાં શાલીન રાક્ષસના રોલમાં છે. એ વિશે શાલીને કહ્યું કે ‘મને લાગે છે કે આ કોઈ અચીવમેન્ટ નથી. આ એક જવાબદારી છે. મારા માટે આ એક આશીર્વાદ છે અને એને હું ગંભીરતાથી લઉં છું. એકતા કપૂર જેવી નિષ્ઠાવાન વ્યક્તિએ મારા પર ભરોસો મૂકયો એથી હું ૧૦૦ ટકા સમર્પણ આપીશ. શોમાં હું એક વિનમ્ર, ઓછો આત્મવિશ્વાસુ અને એક સાધારણ વ્યક્તિના રોલમાં છું. તેને પોતાની પણ ઓળખ નથી. જોકે અચાનક તેને જાણ થાય છે કે તે એક રાક્ષસ છે અને તેની પાસે ઘણી તાકાત છે. આની આસપાસ જ મારું પાત્ર ફર્યા કરે છે. આ એકદમ અલગ અને અનોખું કૅરૅક્ટર છે. આવું કદી જોયું નહીં હોય. આવું કદી ક્રીએટ નથી કરવામાં આવ્યું. તે પોતાનામાં જ હટકે છે. સ્ટોરીમાં દેખાડવામાં આવ્યું છે કે એક રાક્ષસ પરીના પ્રેમમાં પડે છે અને તેને પરીઓની દુનિયામાં લઈ જાય છે. એથી આખો પ્લૉટ અલગ અને કાલ્પનિક છે.’
‘બેકાબૂ’ના સેટ પર ઈજા થઈ શાલીનને
ADVERTISEMENT
શાલીન ભનોતને ‘બેકાબૂ’ના શૂટિંગ દરમ્યાન ઈજા થઈ હોવાનું જાણવા મળ્યું છે. તેના શરીર પર જખમ થયા છે. જોકે ઇન્જર્ડ થવાની પુષ્ટિ ન તો પ્રોડક્શન-હાઉસે કે ન તો શાલીને કરી છે. ઍક્શન સીક્વન્સ વખતે ઈજા થઈ હોવા છતાં તેણે શૂટિંગ ચાલુ રાખ્યું હતું. તે દિવસ-રાત શૂટિંગ કરી રહ્યો છે અને મુશ્કેલીથી તેને આરામ મળે છે. આ શોમાં શિવાંગી જોશી પણ છે. તાજેતરમાં તેણે જાહેર કર્યું હતું કે મને કિડની-ઇન્ફેક્શન થવાથી હૉસ્પિટલમાં ઍડ્મિટ હતી. શોમાં તે નાનકડી પરંતુ અગત્યની ભૂમિકામાં જોવા મળશે. એવામાં હવે શાલીનને ઈજા થઈ હોવાના સમાચાર વહેતા થયા છે.
