એક લંબા સફર લમ્હોં મેં ગુઝર ગયા : ધર્મેન્દ્ર
બૉલીવુડમાં પચાસ વર્ષ પસાર કરનાર ધર્મેન્દ્રનું કહેવું છે કે તેમની આટલી લાંબી મુસાફરી કેટલીક ક્ષણમાં પસાર થઈ ગઈ હોય એવું લાગે છે. ધર્મેન્દ્રએ તેમની લાઇફમાં ઘણી ફિલ્મો કરી છે અને તેમને બૉલીવુડના માચોમૅન તરીકે પણ ઓળખવામાં આવે છે. બૉલીવુડની તેમની ફિલ્મી સફર વિશે ધર્મેન્દ્ર કહે છે, ‘એક લંબા સફર લમ્હોં મેં ગુઝર ગયા. હું હવે એ વિશે વિચારું છું કે એ કેમ આટલી જલદી પસાર થઈ ગયું. હું મારા સાથી કલાકારો અને અમારા સમયની સેટ પરની મસ્તીને ખૂબ જ મિસ કરું છું. હું ઘણુંબધું મિસ કરી રહ્યો છું. આ એક ખૂબ જ સુંદર મુસાફરી રહી છે. જોકે મારું માનવું છે કે ફેમ અને ગ્લૅમર હંમેશાં નથી રહેતાં. તમે એક સામાન્ય અને દયાળુ વ્યક્તિ તરીકે રહો અને તમારી આ ક્વૉલિટી તમારી સાથે હંમેશાં રહેશે. આવી ક્વૉલિટી કંઈ ઑટોમૅટિક નથી આવી જતી. મારામાં આ કવૉલિટી મારાં મમ્મી-પપ્પા પાસેથી આવી હતી. મારામાંથી આ ક્વૉલિટી સની અને બૉબીમાં ગઈ છે.’
ધર્મેન્દ્રને કવિતાઓ લખવાનો શોખ છે અને એ વિશે પૂછતાં તેઓ કહે છે, ‘હું એક ઇમોશનલ વ્યક્તિ છું, તેથી કવિતાઓ લખવી મારા માટે સારી વાત છે. જબ કુછ કહા ના જાએ, જબ કુછ સુના ના જાએ તબ મેરી તન્હાઈ મેરી ખામોશી સે ઔર મેરી ખામોશી મેરી તન્હાઈ સે બાતેં કર લેતી હૈ.’
