ટ્વિટર પર બ્લુ ટિક ખરીદી સિદ્ધાર્થનું બનાવવામાં આવ્યું ફેક અકાઉન્ટ
‘ધૂમ 4’ને લઈને ઊડી અફવા
સિદ્ધાર્થ આનંદ ‘ધૂમ 4’ની જાહેરાત કરવાનો છે એવી અફવા ચાલી રહી છે. આ વાત લોકોને એટલા માટે સાચી લાગી રહી હતી, કારણ કે ટ્વિટર પર વેરિફાઇડ અકાઉન્ટ પરથી એની જાહેરાત કરવામાં આવી હતી. આ ટ્વિટર અકાઉન્ટ પર સિદ્ધાર્થ આનંદનું નામ લખવામાં આવ્યું હતું. જોકે આ એક ફેક અકાઉન્ટ છે. ઇલૉન મસ્કે જ્યારથી ટ્વિટર ખરીદ્યું છે ત્યારથી એ કન્ટ્રોવર્સીમાં છે. જોકે હવે વધુ ખોટા સમાચારોને વેગ પણ એના કારણે જ મળશે. આ માટેનું મુખ્ય કારણ છે કે હવે કોઈ પણ વ્યક્તિ ટ્વિટર પર બ્લુ ટિક ખરીદી શકે છે. આ જ રીતે એક માથાફરેલાએ ટ્વિટર પર બ્લુ ટિક ખરીદ્યું હતું. એ અકાઉન્ટનું નામ સિદ્ધાર્થ આનંદ આપવામાં આવ્યું હતું અને ‘ધૂમ 4’ની જાહેરાત કરી હતી. જોકે આ ફિલ્મને લઈને હજી સુધી કોઈ ઑફિશ્યલ જાહેરાત કરવામાં નથી આવી. તેમ જ એને સિદ્ધાર્થ ડિરેક્ટ કરશે કે કેમ એ પણ એક સવાલ છે. તેણે હાલમાં જ હૃતિક રોશન સાથેની ‘ફાઇટર’નું શેડ્યુલ પૂરું કર્યું છે.
