ધ રોશન્સની સક્સેસ-પાર્ટીમાં રાકેશ રોશને વાતવાતમાં આ સંકેત આપી દીધો
હૃતિક રોશન, રેખા, રાકેશ રોશન
બૉલીવુડની સૌથી સફળ સુપરહીરો ફ્રૅન્ચાઇઝી ‘ક્રિશ’ની આગામી ફિલ્મ ‘ક્રિશ 4’ લાંબા સમયથી ચર્ચામાં છે. હૃતિક રોશનને સુપરહીરો તરીકે ચમકાવતી આ ફિલ્મ વિશે રોજ કંઈ ને કંઈ અપડેટ આવતું રહે છે. હવે આ ફિલ્મને લગતા મોટા સમાચાર આવ્યા છે.
હાલમાં ઓવર ધ ટૉપ (OTT) પ્લૅટફૉર્મ નેટફ્લિક્સ પર ડૉક્યુમેન્ટરી સિરીઝ ‘ધ રોશન્સ’ રિલીઝ થઈ હતી. આ સિરીઝમાં રોશન પરિવારના સંઘર્ષ અને સફળતાની ઇન્સાઇડ સ્ટોરી દર્શાવવામાં આવી છે. આ સિરીઝને દર્શકો તેમ જ વિવેચકો તરફથી પૉઝિટિવ પ્રતિભાવ મળ્યો છે અને આ વાતને સેલિબ્રેટ કરવા માટે રાકેશ રોશને સક્સેસ-પાર્ટી હોસ્ટ કરી હતી. આ પાર્ટીમાં ઍક્ટ્રેસ રેખાએ પણ હાજરી આપી હતી. આ પાર્ટીમાં જ્યારે ફોટોગ્રાફરોએ રાકેશ રોશનને સવાલ કર્યો કે શું ‘ક્રિશ 4’માં રેખા જોવા મળશે? ત્યારે રાકેશ રોશને કહ્યું કે આ ફિલ્મમાં તમને બધાં જ જોવા મળશે. રાકેશ રોશનના આ નિવેદનથી સ્પષ્ટ થઈ ગયું કે હૃતિક રોશન સ્ટારર ‘ક્રિશ 4’માં રેખા જોવા મળશે.
ADVERTISEMENT
રેખા ‘કોઈ મિલ ગયા’થી આ સુપરહીરો સિરીઝનો મહત્ત્વનો હિસ્સો રહી છે. તે ‘ક્રિશ’ અને ‘ક્રિશ 3’માં પણ જોવા મળી હતી. જોકે હાલમાં ‘ક્રિશ 4’ની રિલીઝ-ડેટ વિશે કોઈ જાહેરાત કરવામાં નથી આવી.
