‘મિર્ઝાપુર 3’માં જોવા નહીં મળે એમ જણાવતાં દિવ્યેન્દુ શર્માએ કહ્યું...
દિવ્યેન્દુ શર્મા
વેબ-સિરીઝ ‘મિર્ઝાપુર’માં મુન્ના ભૈયાના રોલમાં દિવ્યેન્દુ જોવા મળ્યો હતો. તેનું કહેવું છે કે આ રોલથી તેને અકળામણ થાય છે. એના બીજા ભાગમાં તેના કૅરૅક્ટરની હત્યા કરવામાં આવે છે. જોકે દર્શકોને એવી અપેક્ષા હતી કે એની ત્રીજી સીઝનમાં દિવ્યેન્દુ પાછો જોવા મળશે. જોકે દિવ્યેન્દુએ ચોખવટ કરી છે કે તે ત્રીજા પાર્ટમાં નથી દેખાવાનો. ‘મિર્ઝાપુર 3’માં પંકજ ત્રિપાઠી, અલી ફઝલ, રસિકા દુગલ અને શ્વેતા ત્રિપાઠી શર્મા જોવા મળશે. આ શો ઍમેઝૉન પ્રાઇમ વિડિયો પર રિલીઝ થવાનો છે. દિવ્યેન્દુની ફિલ્મ ‘મડગાંવ એક્સપ્રેસ’ હાલમાં જ રિલીઝ થઈ છે. હવે ‘મિર્ઝાપુર 3’માં નહીં જોવા મળે એ વિશે દિવ્યેન્દુ કહે છે, ‘હું જાહેર કરવા માગું છું કે હું ‘મિર્ઝાપુર 3’માં નથી દેખાવાનો. હું જ્યારે એ કૅરૅક્ટરમાં હોઉં છું તો એ મારી પર્સનાલિટી પર અસર પાડે છે. આપણે કોઈ પણ પાત્રને ભરપૂર પ્રેમ આપીને એની અંદર એકદમ ઊંડા ન ઊતરવું જોઈએ, કારણ કે એ સરળ નથી હોતું. એ વખતે એ પાત્ર મારા માટે ખૂબ ડાર્ક હતું. એ પાત્રમાં મને ગૂંગળામણ થઈ રહી હતી. તમને પોતાને પણ એહસાસ નથી હોતો કે તમે એ ઝોનમાં અંદર સુધી ઊતરી ગયા હો છો. તમે જ્યારે એમાંથી બહાર આવો છો ત્યારે જ તમને એ વાતનો એહસાસ થાય છે.’
