૬ નવેમ્બરે તેણે દીકરીને જન્મ આપ્યો હતો
ફાઇલ તસવીર
દીકરીને જન્મ આપ્યા બાદ આલિયા ભટ્ટે હવે પોતાને ફરીથી સુડોળ બનાવવા માટે પ્રયાસ શરૂ કરી દીધા છે. ૬ નવેમ્બરે તેણે દીકરીને જન્મ આપ્યો હતો. હવે દોઢ મહિના બાદ તેણે યોગ કરવાનું શરૂ કરી દીધું છે અને એનો ફોટો તેણે શૅર કર્યો છે. એ ફોટોમાં તે એરિયલ યોગ કરતી દેખાય છે. એ ફોટોને ઇન્સ્ટાગ્રામ પર શૅર કરીને આલિયાએ કૅપ્શન આપી હતી, ‘ડિલિવરીના દોઢ મહિના બાદ ધીમે-ધીમે હું હવે મારા કોર સાથે જોડાઈ રહી છું અને એ પણ મારાં ટીચર અનુષ્કાના માર્ગદર્શન સાથે હું આ કરી શકવામાં સક્ષમ બની છું. હું તમામ મમ્મીઓને કહેવા માગું છું કે ડિલિવરી બાદ તમારું શરીર સંભાળો. એવું કાંઈ ન કરવું જે તમારું શરીર કરવા માટે મંજૂરી ન આપતું હોય. મારા વર્કઆઉટ્સનાં પહેલાં એકાદ-બે અઠવાડિયાં મેં બ્રીધ, વૉક, મારી સ્ટેબિલિટી શોધી અને ફરીથી બૅલૅન્સનો પ્રયાસ કર્યો (મને હજી ઘણો લાંબો સમય લાગશે). થોડો સમય લો, તમારા શરીરની પ્રશંસા કરો. મેં આ વર્ષે મક્કમ નિર્ધાર કર્યો હતો કે હું મારા શરીર પર વધુ પ્રેશર નહીં આપું. બાળકને જન્મ આપવો એ એક ચમત્કાર જ છે. સાથે જ તમારા શરીરને પણ એટલો જ પ્રેમ અને સપોર્ટ આપો, એટલું તો તમે કરી શકો.
તા.ક. દરેકનું શરીર અલગ હોય છે. કોઈ પણ પ્રકારની એક્સરસાઇઝ કરતાં પહેલાં તમારા ડૉક્ટરની સલાહ જરૂર લેજો.’
