સૂરિયાને બેસ્ટ ઍક્ટર તથા આશા પારેખને દાદાસાહેબ ફાળકે અવૉર્ડથી સન્માનિત
અજય દેવગનને મળ્યો બેસ્ટ ઍક્ટરનો નૅશનલ અવૉર્ડ
નવી દિલ્હીના વિજ્ઞાન ભવનમાં આયોજિત નૅશનલ ફિલ્મ અવૉર્ડ્સની ઇવેન્ટમાં અજય દેવગનને બેસ્ટ ઍક્ટરનો અવૉર્ડ મળ્યો છે. એ દરમ્યાન આશા પારેખને દાદાસાહેબ ફાળકે અવૉર્ડથી સન્માનિત કરવામાં આવ્યાં હતાં. સિનેમામાં આપેલા યોગદાન બદલ તેમને આ અવૉર્ડ આપવામાં આવ્યો હતો. અવૉર્ડ મેળવ્યા બાદ આશા પારેખે કહ્યું કે ‘મને આપવામાં આવેલા આ સન્માનને લઈને હું આભારી છું કે મારા ૮૦મા બર્થ-ડેના એક દિવસ અગાઉ મને આ અવૉર્ડ મળ્યો છે.’
‘તાન્હાજી : ધ અનસંગ વૉરિયર’ માટે અજય દેવગનને બેસ્ટ ઍક્ટરનો અવૉર્ડ મળ્યો હતો. ‘તાન્હાજી : ધ અનસંગ વૉરિયર’ને બેસ્ટ પૉપ્યુલર ફિલ્મ પ્રોવાઇડિંગ હોલસમ એન્ટરટેઇનમેન્ટનો અવૉર્ડ મળ્યો હતો. તો બીજી તરફ સૂરિયાને તામિલ ફિલ્મ ‘સુરારાઈ પોતરુ’ માટે બેસ્ટ ઍક્ટરનો અવૉર્ડ મળ્યો હતો. સાથે જ આ ફિલ્મને બેસ્ટ ફીચર ફિલ્મનો પણ અવૉર્ડ આપવામાં આવ્યો હતો. ગીતકાર મનોજ મુન્તશીરને ‘સાઇના’ માટે બેસ્ટ લિરિક્સનો નૅશનલ અવૉર્ડ આપવામાં આવ્યો હતો. સાથે જ બેસ્ટ મ્યુઝિક ડિરેક્શનનો અવૉર્ડ વિશાલ ભારદ્વાજને મળ્યો છે. તેમને ડૉક્યુમેન્ટરી ફિલ્મ ‘1232 KMs’ના ‘મરેંગે તો વહીં જાકર’ માટે આ અવૉર્ડ આપવામાં આવ્યો છે. આ તમામ અવૉર્ડ પ્રેસિડન્ટ દ્રૌપદી મુર્મુના હસ્તે આપવામાં આવ્યા હતા. અવૉર્ડ મળતો ફોટો ઇન્સ્ટાગ્રામ પર શૅર કરીને અજય દેવગને કૅપ્શન આપી હતી, ‘કેટલી જીત મળી કે કેટલા આશીર્વાદ મળ્યા છે એ નથી ગણી રહ્યો, માત્ર આ બધા માટે સૌનો આભાર માની રહ્યો છું. તમે આપેલા પ્રેમને કારણે આ જીત તમારી સાથે શૅર કરું છું. ભારતનાં પ્રેસિડન્ટ દ્રૌપદી મુર્મુના હાથે આ અવૉર્ડ મેળવીને સન્માન અનુભવું છું.’
ADVERTISEMENT
