૧૦ વર્ષ પહેલાં બનેલી અજય દેવગનની ફિલ્મ નામ હવે રિલીઝ થશે

‘નામ’માં અજય સાથે ભૂમિકા ચાવલા અને સમીરા રેડ્ડી છે

અજય દેવગન

દિવાળી પર અજય દેવગનની ‘સિંઘમ અગેઇન’ આવી રહી છે અને એ બૉક્સ-ઑફિસ પર તરખાટ મચાવશે જ એવું ધારીને અજયની એક જૂની ફિલ્મને રિલીઝ કરવાની તૈયારી એના નિર્માતાઓએ કરી છે. ‘નામ’ નામની આ ફિલ્મના પ્રોડ્યુસરોએ ગઈ કાલે જાહેર કર્યું હતું કે આ મૂવી બાવીસમી નવેમ્બરે થિયેટરોમાં રિલીઝ થશે.

ADVERTISEMENT

આ ફિલ્મનું શૂટિંગ ૨૦૧૪માં થયું હતું, પણ વિવિધ કારણોસર એ રિલીઝ નહોતી થઈ શકી. ‘નામ’માં અજય સાથે ભૂમિકા ચાવલા અને સમીરા રેડ્ડી છે.

ઉલ્લેખનીય છે કે દિવાળી પર ‘સિંઘમ અગેઇન’ સાથે ટકરાનારી ‘ભૂલભુલૈયા 3’ના ડિરેક્ટર અનીસ બઝમીએ જ ‘નામ’નું ડિરેક્‍શન કર્યું છે. અજય-બઝમીની જોડી ‘નામ’ પહેલાં ‘હલચલ’ (૧૯૯૫), ‘પ્યાર તો હોના હી થા’ (૧૯૯૮) અને ‘દીવાનગી’ (૨૦૦૨) જેવી ફિલ્મો આપી ચૂકી છે. ‘નામ’ એક સાઇકોલૉજિકલ થ્રિલર છે જેમાં યાદદાસ્ત ગુમાવી ચૂકેલો એક માણસ પોતાની ઓળખ શોધવાનું અભિયાન આદરે છે.