૨૦૨૨માં શાહરુખ ખાને આપેલી સલાહ ફરી ચર્ચાના ચકડોળે ચડી
શાહરુખ ખાન
હાલમાં જ્યારે ચારે તરફ અઠવાડિયામાં ૯૦ કલાક કામ કરવાના મુદ્દે વિવાદ ચાલી રહ્યો છે ત્યારે બૉલીવુડના કિંગ ખાન શાહરુખની સફળ થવા માટેની એક જૂની સલાહ સોશ્યલ મીડિયામાં વાઇરલ થઈ રહી છે. હકીકતમાં શાહરુખે ૨૦૨૨માં એક ચૅનલને આપેલા ઇન્ટરવ્યુમાં જણાવ્યું હતું કે સફળતા મેળવવા માટે સતત પ્રયાસ કરવાનો અભિગમ હોવો જોઈએ. શાહરુખે સલાહ આપી હતી કે સફળતા માટે ન જમવું જોઈએ કે ન સૂવું જોઈએ. એટલે જ્યાં સુધી સફળતા ન મળે ત્યાં સુધી ભૂખ અને ઊંઘને પણ મહત્ત્વ ન આપવું જોઈએ.
શાહરુખની આ સલાહ પરંપરાગત વર્ક-લાઇફ બૅલૅન્સ અને રિલૅક્સેશનના કન્સેપ્ટ સામે પડકાર છે. હકીકતમાં શાહરુખનો મત હતો કે સતત સમર્પિત પ્રયાસ જ સફળતા મેળવવાની માસ્ટર-કી છે.
