વિમેન્સ એશિયા કપની ફાઇનલમાં આજે ટકરાશે ભારત v/s શ્રીલંકા

સાત વાર વિમેન્સ એશિયા કપ જીતનાર ભારત સામે પહેલી વાર ટાઇટલ જીતવા ઊતરશે શ્રીલંકન ટીમ : આ ટુર્નામેન્ટમાં શ્રીલંકન ટીમ સામે ક્યારેય નથી હારી ભારતીય ટીમ

ટ્રોફી સાથે બન્ને ટીમની કૅપ્ટન

શ્રીલંકાના દામ્બુલામાં રંગીરી દામ્બુલા ઇન્ટરનૅશનલ સ્ટેડિયમમાં આજે બપોરે ત્રણ વાગ્યાથી વિમેન્સ એશિયા કપ 2024ની ધમાકેદાર ફાઇનલ મૅચ રમાશે. ભારત અને શ્રીલંકાની ટીમ આ ટુર્નામેન્ટમાં છઠ્ઠી વાર ફાઇનલ મૅચ રમશે. ગયા વર્ષે જ ભારતીય ટીમ શ્રીલંકાને ૮ વિકેટે હરાવીને સાતમી વાર એશિયા કપ ચૅમ્પિયન બની હતી. ભારતીય ટીમ બંગલાદેશને અને યજમાન ટીમ શ્રીલંકા પાકિસ્તાનને હરાવીને અહીં સુધી પહોંચી છે.

આ ટુર્નામેન્ટમાં ભારતીય ઑલરાઉન્ડર દીપ્તિ શર્મા ૯ વિકેટ સાથે ટૉપ વિકેટ-ટેકર છે અને શ્રીલંકન કૅપ્ટન ચમરી અટાપટ્ટુ ૨૪૩ રન સાથે ટૉપ રન-સ્કોરર છે. ભારતીય ઓપનર શફાલી વર્મા (૧૮૪ રન) મોટી ઇનિંગ્સ રમીને નંબર-વન બૅટર બનવાનો પ્રયત્ન જરૂરથી કરશે. બન્ને ટીમ આ ટુર્નામેન્ટમાં અનબીટેબલ રહી છે. શ્રીલંકન ટીમ પહેલી વાર અને ભારતીય ટીમ રેકૉર્ડ આઠમી વાર આ ટુર્નામેન્ટમાં ચૅમ્પિયન બનવા ઊતરશે.

હેડ-ટુ-હેડ રેકૉર્ડ
કુલ મૅચ : ૨૪
ભારત જીત્યું : ૧૯
શ્રીલંકા જીત્યું : ૦૪
નો રિઝલ્ટ : ૦૧