14 October, 2023 06:52 PM IST | Mumbai | Gujarati Mid-day Online Correspondent
વિરાટ કોહલીની ફાઈલ તસવીર
પાકિસ્તાન વિરુદ્ધ મેચમાં વિરાટ કોહલી ખોટી જર્સી પહેરીને મેદાનમાં પહોંચ્યો હતો. તેને ખૂબ જ જલ્દી આ વાતની ખબર પડી ગઈ અને તે મેદાનમાંથી બહાર ગયો. થોડીવાર પછી વિરાટ કોહલી પાછો આવ્યો ત્યારે તે વર્લ્ડ કપની જર્સીમાં જોવા મળ્યો.
ભારત અને પાકિસ્તાન વચ્ચે વર્લ્ડ કપની મેચ શરૂ થતાં પહેલા જ વિરાટ કોહલીને મેદાનમાંથી બહાર જવું પડ્યું. કોહલી ખોટી જર્સી પહેરીને મેદાનમાં આવી ગયો હતો અને રાષ્ટ્રગાન સમયે તેની જર્સી અન્ય ખેલાડીઓની જર્સી કરતા અલગ હતી. જો કે, પછીથી કોહલીને પોતાની ભૂલનો અનુભવ થયો અને તે મેદાનમાંથી બહાર ચાલ્યો ગયો. જ્યારે વિરાટ કોહલી પાછો આવ્યો તો વર્લ્ડકપની યોગ્ય જર્સી પહેરીને આવ્યો હતો.
શું છે ઘટના?
ભારત-પાકિસ્તાન મેચ શરૂ થતા પહેલા નિયમ મુજબ બંને દેશોના ખેલાડીઓ મેદાનમાં ઉભા રહ્યા હતા અને બંને ટીમના દેશનું રાષ્ટ્રગીત વગાડવામાં આવ્યું હતું. આ દરમિયાન જોવા મળ્યું કે વિરાટ કોહલીની જર્સી ટીમ ઈન્ડિયાના બાકીના ખેલાડીઓ કરતા અલગ છે. કોહલીની જર્સીના ખભા પર માત્ર ત્રણ સફેદ પટ્ટીઓ હતી. તે જ સમયે, અન્ય ખેલાડીઓની જર્સીમાં ખભાની નજીક ત્રિરંગાની પટ્ટીઓ હતી. જેમાં સફેદ, લીલો અને કેસરી રંગોનો સમાવેશ થાય છે. તમામ ખેલાડીઓની જર્સી પર વર્લ્ડ કપનો લોગો પણ હતો. આ ODI વર્લ્ડ કપ 2023 માટે ભારતીય ટીમની ઑફિશિયલ જર્સી છે.
ટૉસના થોડાક સમય બાદ કોહલીને ખબર પડી કે તે ખોટી જર્સી પહેરીને મેદાનમાં આવી ગયો છે. એવામાં વિરાટ મેદાનની બહાર ગયો અને જ્યાં તે પાછો આવ્યો તો તેણે યોગ્ય જર્સી પહેરી હતી, જેમાં ટ્રાયકલર પટ્ટીઓ હતી અને વિશ્વકપનો લોગો પણ હતો.
વિરાટ કોહલીએ રમતની શરૂઆત પહેલા સચિન તેંડુલકર સાથે મુલાકાત કરી હતી. આ મીટિંગની તસવીરો વાયરલ થઈ રહી છે. આ દરમિયાન પણ કોહલીએ ખોટી જર્સી પહેરી હતી.
આ પછી વિરાટે આ શાનદાર મેચની મજા માણી. તે મજાકના મૂડમાં પણ જોવા મળ્યો હતો. જ્યારે મોહમ્મદ રિઝવાન બેટિંગ કરવા આવ્યો અને તે પહેલા બોલનો સામનો કરવામાં ઘણો સમય લઈ રહ્યો હતો, ત્યારે વિરાટે ઘડિયાળ તરફ ઈશારો કરીને રિઝવાનની મજાક ઉડાવી.