26 December, 2024 11:33 AM IST | Centurion | Gujarati Mid-day Correspondent
પાકિસ્તાનનો કૅપ્ટન શાન મસૂદ અને સાઉથ આફ્રિકાનો કૅપ્ટન ટેમ્બા બવુમા
બૉક્સિંગ ડે પર આજે સાઉથ આફ્રિકા અને પાકિસ્તાન વચ્ચે પણ ટેસ્ટમૅચ શરૂ થશે. બે ટેસ્ટની આ સિરીઝમાં ટેમ્બા બવુમા સાઉથ આફ્રિકાનું અને શાન મસૂદ પાકિસ્તાનનું નેતૃત્વ કરશે. વર્લ્ડ ટેસ્ટ ચૅમ્પિયનશિપ (WTC)ની ફાઇનલમાં પહોંચવાની રેસમાં પાકિસ્તાન ભલે બહાર છે, પણ એ સાઉથ આફ્રિકાને આ સિરીઝમાં પછાડીને ભારતીય ટીમને મદદ કરી શકે છે. પહેલી ટેસ્ટ ભારતીય સમય અનુસાર બપોરે ૧.૩૦ વાગ્યે શરૂ થશે. સ્પોર્ટ્સ૧૮ અને જિયો સિનેમા પર આ મૅચનો આનંદ માણી શકાશે.
સાઉથ આફ્રિકા ૬૩.૩૩ પૉઇન્ટની ઍવરેજ સાથે WTC પૉઇન્ટ ટેબલ પર પ્રથમ ક્રમે છે અને એ સાતમા ક્રમના પાકિસ્તાન (૩૩.૩૩ પૉઇન્ટ) સામે આ સિરીઝમાં માત્ર એક ટેસ્ટ જીતીને ફાઇનલ માટે ક્વૉલિફાય થઈ જશે. સિરીઝ ૦-૧થી હારવાથી સાઉથ આફ્રિકાની પૉઇન્ટ ઍવરેજ ૫૫.૫૬ થશે, જ્યારે ૦-૨થી સિરીઝ હારશે તો ૫૨.૭૮ પૉઇન્ટ ઍવરેજ થશે. આ કિસ્સામાં ભારત અને ઑસ્ટ્રેલિયાની ટેસ્ટ-મૅચના રિઝલ્ટ પર સાઉથ આફ્રિકન ટીમે નજર રાખવી પડશે.
ટેસ્ટનો હેડ-ટુ-હેડ રેકૉર્ડ
કુલ મૅચ ૨૮
સાઉથ આફ્રિકાની જીત ૧૫
પાકિસ્તાનની જીત ૦૬
ડ્રૉ ૦૭