07 February, 2023 01:26 PM IST | Mumbai | Gujarati Mid-day Correspondent
ફૅફ ડુ પ્લેસી તસવીર સૌજન્ય મિડ-ડે
સાઉથ આફ્રિકાની એસએ૨૦ લીગની પ્રથમ સીઝનમાં પ્રિટોરિયા કૅપિટલ્સ સેમી ફાઇનલમાં પહોંચ્યા બાદ રવિવારે જૉબર્ગ સુપરકિંગ્સની ટીમ પણ લાસ્ટ-ફોરમાં પહોંચી ગઈ હતી. સુપરકિંગ્સે બૅટિંગ પસંદ કર્યા બાદ કૅપ્ટન ફૅફ ડુ પ્લેસી (૯૨ રન, ૬૧ બૉલ, ચાર સિક્સર, સાત ફોર) અને રીઝા હેન્ડ્રિક્સ (૪૦ રન, ૩૬ બૉલ, પાંચ ફોર)ની ૧૧૯ રનની ઓપનિંગ પાર્ટનરશિપની મદદથી ૬ વિકેટે ૧૬૦ રન બનાવ્યા હતા, એના જવાબમાં સનરાઇઝર્સ ઈસ્ટર્ન કેપની ટીમ ટેમ્બા બવુમાના ૫૦ રન અને કૅપ્ટન માર્કરમના ૩૪ રન છતાં ૨૦ ઓવરમાં ૯ વિકેટે ૧૩૬ રન જ બનાવી શકી હતી અને ૨૪ રનથી પરાજિત થઈ હતી. સુપરકિંગ્સ બાવીસ પૉઇન્ટ સાથે બીજા નંબરે છે અને એણે સેમીમાં એન્ટ્રી કરી લીધી છે. રવિવારે બીજી મૅચમાં ડર્બન્સ સુપર જાયન્ટ્સે હિન્રીચ ક્લાસેન (૧૦૪ અણનમ, ૪૪ બૉલ, છ સિક્સર, દસ ફોર)ની આક્રમક સદીની મદદથી ૪ વિકેટે ૨૫૪ રન બનાવ્યા બાદ પ્રિટોરિયા કૅપિટલ્સને ૧૩.૫ ઓવરમાં ૧૦૩ રનમાં ઑઆઉટ કરીને ૧૫૧ રનના આ સ્પર્ધામાં રેકૉર્ડ માર્જિનથી વિજય મેળવ્યો હતો.
યુએઈની આઇએલટી૨૦ લીગમાં પ્લે-ઑફમાં પહોંચી ગયેલી એમઆઇ એમિરેટ્સ ટીમનો દુબઈ કૅપિટલ્સ સામે ૭ વિકેટે પરાજય થયો હતો. એમઆઇએ પૂરનના ૪૩ રનની મદદથી ૭ વિકેટે ૧૬૪ રન બનાવ્યા બાદ દુબઈની ટીમે દાસુન શનાકા (૫૮ અણનમ, ૩૬ બૉલ, ત્રણ સિક્સર, પાંચ ફોર)ની અને સિકંદર રઝા (૫૬ અણનમ, ૩૬ બૉલ, ચાર સિક્સર, ચાર ફોર)ની ફટકાબાજીથી ૧૮.૧ ઓવરમાં ૩ વિકેટે ૧૬૬ રન બનાવીને રોમાંચક વિજય મેળવ્યો હતો.
એક સમયે ભારતના ટોચના પાંચ બૅટર્સમાં ગણાતા વિનોદ કાંબળીએ નશો કર્યા બાદ પત્ની ઍન્ડ્રિયા હ્યુઇટ પર હુમલો કર્યો હતો અને તેને ગાળો આપી એ ઘટનામાં કાંબળી વિરુદ્ધ ઍન્ડ્રિયાની ફરિયાદના આધારે એફઆઇઆર નોંધાયા બાદ પોલીસે બાંદરામાં કાંબળીના ઘરે જઈને તેને સીઆરપીસીની કલમ ૪૧-એ હેઠળ નોટિસ આપી હતી અને સ્ટેટમેન્ટ રેકૉર્ડ કરાવવા પોલીસ સ્ટેશનમાં હાજર થવાનું કહ્યું હતું. ગયા વર્ષે ફેબ્રુઆરીમાં કાંબળીએ તેની કાર પોતાની સોસાયટીના ગેટ સાથે ટકરાવી એને પગલે ફરિયાદ થતાં તેની ધરપકડ થઈ હતી અને પછીથી તેને ચેતવણી આપીને જામીન પર છોડી મૂકવામાં આવ્યો હતો.