હાર્દિક પંડ્યા સહિત આખી MI ટીમને BCCIએ ફટકાર્યો દંડ, કૅપ્ટન પર બૅનની લટકતી તલવાર

હાર્દિક પંડ્યા સહિત મુંબઈ ઈન્ડિયન્સની આખી ટીમ પર BCCIએ દંડ ફટકાર્યો છે. કૅપ્ટન પર પ્રતિબંધનું જોખમ પણ ફરી રહ્યું છે. જો હજી એકવાર સ્લો ઓવર રેટ ટીમ કરે છે તો પછી કૅપ્ટનને બૅન કરી દેવામાં આવશે.

હાર્દિક પંડ્યા (ફાઈલ તસવીર)

IPL 2024, Match 48 - LSG vs MI: હાર્દિક પંડ્યા સહિત મુંબઈ ઈન્ડિયન્સની આખી ટીમ પર BCCIએ દંડ ફટકાર્યો છે. કૅપ્ટન પર પ્રતિબંધનું જોખમ પણ ફરી રહ્યું છે. જો હજી એકવાર સ્લો ઓવર રેટ ટીમ કરે છે તો પછી કૅપ્ટનને બૅન કરી દેવામાં આવશે.

IPL 2024, Match 48 - LSG vs MI: મુંબઈ ઈન્ડિયન્સ માટે મંગળવાર 30 એપ્રિલનો દિવસ ખૂબ જ ખરાબ રહ્યો. ટીમને સીઝનની સાતમી હારનો સામનો કરવો પડ્યો અને આ ટીમના પ્લેઑફમાં પહોંચવાના ચાન્સિસ પણ ઘટી ગયા. આ સિવાય ટીમને હવે એક નવી મુશ્કેલીનો સામનો કરવો પડ્યો. કૅપ્ટન હાર્દિક પંડ્યા સહિત આખી ટીમ પર બીસીસીઆઈએ મોટો દંડ ફટકાર્યો છે. એટલું જ નહીં કૅપ્ટન હાર્દિક પંડ્યા પર બૅન થવાની તલવાર પણ લટકી રહી છે. મુંબઈને લખનઉ સુપર જાયન્ટ્સ સામે 4 વિકેટથી હારનો સામનો કરવો પડ્યો.

હકીકતે, મુંબઈ ઈન્ડિયન્સના કેપ્ટન હાર્દિક પંડ્યાને ભારત રત્ન અટલ બિહારી વાજપેયી એકના ક્રિકેટ સ્ટેડિયમમાં IPL 2024ની 48 નંબરની મેચ દરમિયાન ધીમી ઓવર રેટ રમવાના કારણે દંડ ફટકારવામાં આવ્યો હતો. IPL 2024માં ટીમનો આ બીજો ગુનો હતો. જેના કારણે કેપ્ટનને ભારે દંડ ફટકારવામાં આવ્યો હતો અને અન્ય ખેલાડીઓ પણ તેનો શિકાર બન્યા હતા.

IPLની આચાર સંહિતાનું ઉલ્લંઘન કરવા બદલ હાર્દિક પંડ્યાને 24 લાખ રૂપિયાનો દંડ ફટકારવામાં આવ્યો છે, જ્યારે ટીમના બાકીના પ્લેઇંગ ઈલેવન અને ઈમ્પેક્ટ પ્લેયર્સને ન્યૂનતમ ઓવર રેટના ગુના માટે 6 લાખ રૂપિયા અથવા મેચ ફીના 25-25 ટકાનો દંડ ફટકારવામાં આવ્યો છે. મામલો અહીં પૂરો નથી થતો, પરંતુ હાર્દિક પંડ્યા પર હવે એક મેચમાંથી સસ્પેન્ડ થવાનો ખતરો છે, કારણ કે ટીમ આવું બે વખત કરી ચૂકી છે. (IPL 2024, Match 48 - LSG vs MI)

આઈપીએલના નિયમો અનુસાર, જો કોઈ ટીમ લીગ તબક્કામાં ત્રણ વખત ધીમી ઓવર રેટ માટે દોષી સાબિત થાય છે, તો કેપ્ટન પર એક મેચનો પ્રતિબંધ મૂકવામાં આવશે. આ સાથે ટીમને દંડ પણ કરવામાં આવશે. હાર્દિક પંડ્યાની કેપ્ટનશીપવાળી ટીમ આ સિઝનમાં આવો જ એક ગુનો કરી ચૂકી છે. મુંબઈ ઈન્ડિયન્સે આઈપીએલ 2024માં પંજાબ કિંગ્સ સામે ધીમો ઓવર રેટ જાળવી રાખ્યો હતો, જેના માટે તેમને દંડ ફટકારવામાં આવ્યો હતો.

નોંધનીય છે કે રોહિત શર્મા ગઈ કાલે પોતાની ૩૭મી વર્ષગાંઠ પર ફ્લૉપ રહ્યો હતો. ગઈ કાલે લખનઉ સુપર જાયન્ટ્સ સામે મુંબઈ ઇન્ડિયન્સ ટૉસ હારીને પ્રથમ બૅટિંગ કરવા ઊતરી હતી. બર્થ-ડે બૉય રોહિત શર્મા માત્ર ૪ રન કરીને મોહસિન ખાનની ઓવરમાં માર્કસ સ્ટૉઇનિસના હાથે કૅચઆઉટ થયો હતો. આ પહેલાં પણ તે ૩૦ એપ્રિલે પોતાના બર્થ-ડેએ IPLમાં ફ્લૉપ રહ્યો હતો. ૨૦૧૪માં સનરાઇઝર્સ હૈદરાબાદ સામે ૧ રન, ૨૦૨૨ અને ૨૦૨૩માં રાજસ્થાન રૉયલ્સ સામે અનુક્રમે ૨ અને ૩  રન બર્થ-ડેના દિવસે બનાવી શક્યો હતો. રસપ્રદ વાત એ હતી કે બર્થ-ડેના દિવસે રમાયેલી છેલ્લી ચારેચાર IPL ઇનિંગ્સમાં તે માત્ર પાંચ બૉલ રમ્યો હતો. રોહિત શર્માએ પત્ની રિતિકા સજદેહ અને મુંબઈની ટીમની હાજરીમાં કેક કટ કરીને બર્થ-ડેની ઉજવણી કરી હતી.