એક વર્ષ બાદ ઇંગ્લૅન્ડની વન-ડે ટીમમાં જો રૂટની વાપસી થઈ

જોસ બટલર કરશે વાઇટ બૉલ ફૉર્મેટની ટીમનું નેતૃત્વ, ઇન્જર્ડ ઑલરાઉન્ડર બેન સ્ટોક્સ સિલેક્ટ ન થયો : ભારતની ટૂર અને પાકિસ્તાનમાં આયોજિત ચૅમ્પિયન્સ ટ્રોફી માટે ઇંગ્લૅન્ડની ટીમ જાહેર

બેન સ્ટોક્સ

ઇંગ્લૅન્ડ ક્રિકેટ બોર્ડે વર્ષ ૨૦૨૫ની શરૂઆતની મહત્ત્વની ટુર્નામેન્ટ માટે ગઈ કાલે મોટી જાહેરાત કરી હતી. ભારત સામેની પાંચ T20ની સાથે ત્રણ વન-ડે મૅચની સિરીઝ અને પાકિસ્તાનમાં આયોજિત વન-ડે ચૅમ્પિયન્સ ટ્રોફી માટે ઇંગ્લૅન્ડની સ્ક્વૉડ જાહેર કરવામાં આવી છે. વન-ડે સ્ક્વૉડમાં જો રૂટની એક વર્ષ બાદ વાપસી થઈ રહી છે, કારણ કે તે છેલ્લે ભારતમાં નવેમ્બર ૨૦૨૩માં વર્લ્ડ કપ દરમ્યાન છેલ્લી વન-ડે મૅચ રમ્યો હતો.

ઑલરાઉન્ડર અને ટેસ્ટ કૅપ્ટન બેન સ્ટોક્સની પસંદગી કરવામાં આવી નથી, કારણ કે તે આ મહિનાની શરૂઆતમાં ન્યુ ઝીલૅન્ડ સામેની ત્રીજી ટેસ્ટ દરમ્યાન હૅમસ્ટ્રિંગની ઈજામાંથી સ્વસ્થ થઈ રહ્યો છે. જોસ બટલર, જો રૂટ, આદિલ રશીદ અને માર્ક વુડ આ ઇંગ્લૅન્ડની ટીમમાં સામેલ એ ચાર પ્લેયર છે જેણે ૨૦૧૭માં રમાયેલી છેલ્લી ચૅમ્પિયન્સ ટ્રોફી પણ રમી છે.

અનુભવી બૅટ્સમૅન જોસ બટલર ટીમનું નેતૃત્વ કરશે. ભારત ટૂર પર બાવીસમી જાન્યુઆરીથી ૧૨ ફેબ્રુઆરી દરમ્યાન T20 અને વન-ડે સિરીઝ રમ્યા બાદ ઇંગ્લૅન્ડની ટીમ ચૅમ્પિયન્સ ટ્રોફી માટે પાકિસ્તાન રવાના થશે.

ભારત સામેની T20 સિરીઝનું શેડ્યુલ 
૨૨ જાન્યુઆરી - ઈડન ગાર્ડન્સ, કલકત્તા
૨૫ જાન્યુઆરી - ચિદમ્બરમ સ્ટેડિયમ, ચેન્નઈ
૨૮ જાન્યુઆરી - નિરંજન શાહ સ્ટેડિયમ, રાજકોટ
૩૧ જાન્યુઆરી - MCA સ્ટેડિયમ, પુણે
૨ ફેબ્રુઆરી - વાનખેડે સ્ટેડિયમ, મુંબઈ

ભારત સામેની વન-ડે સિરીઝનું શેડ્યુલ 
૬ ફેબ્રુઆરી - VCA સ્ટેડિયમ, નાગપુર
૯ ફેબ્રુઆરી - બારાબતી સ્ટેડિયમ, કટક
૧૨ ફેબ્રુઆરી - નરેન્દ્ર મોદી સ્ટેડિયમ, અમદાવાદ