આજે ઑસ્ટ્રેલિયા અને ઇંગ્લૅન્ડનો જોરદાર જંગ

લાહોરના ગદ્દાફી સ્ટેડિયમમાં ચૅ​મ્પિયન્સ ટ્રોફીની પહેલી મૅચ રમાશે. ગ્રુપ-Bની ટીમ ઇંગ્લૅન્ડ અને ઑસ્ટ્રેલિયા પણ આજે ૨.૩૦ વાગ્યે શરૂ થનારી આ મૅચ સાથે ટુર્નામેન્ટમાં પોતાના અભિયાનની શરૂઆત કરશે

પ્રેસ-કૉન્ફરન્સ દરમ્યાન ઓસ્ટ્રેલિયાનો કૅપ્ટન સ્ટીવ સ્મિથ અને ઇંગ્લૅન્ડનો કૅપ્ટન જોસ બટલર.

આજે લાહોરના ગદ્દાફી સ્ટેડિયમમાં ચૅ​મ્પિયન્સ ટ્રોફીની પહેલી મૅચ રમાશે. ગ્રુપ-Bની ટીમ ઇંગ્લૅન્ડ અને ઑસ્ટ્રેલિયા પણ આજે ૨.૩૦ વાગ્યે શરૂ થનારી આ મૅચ સાથે ટુર્નામેન્ટમાં પોતાના અભિયાનની શરૂઆત કરશે. આ ટુર્નામેન્ટમાં ઑસ્ટ્રેલિયન ટીમ ૨૦૦૬ અને ૨૦૦૯માં બૅક-ટુ-બૅક ચૅમ્પિયન બની હતી, જ્યારે ઇંગ્લૅન્ડની ટીમ ૨૦૦૪ અને ૨૦૧૩માં ફાઇનલ હારીને બે વાર રનર-અપ રહી હતી. ૨૦૨૩ના વન-ડે વર્લ્ડ કપ બાદ ઇંગ્લૅન્ડની ટીમ ચારમાંથી એક પણ વન-ડે સિરીઝ જીતી શકી નથી, જ્યારે ઑસ્ટ્રેલિયન ટીમ ત્રણ વન-ડે સિરીઝમાંથી માત્ર એક ઇંગ્લૅન્ડ સામેની સિરીઝ જીતી હતી. ઇંગ્લૅન્ડની ટીમ છેલ્લે ભારત સામે અને ઑસ્ટ્રેલિયન ટીમ શ્રીલંકા સામે વન-ડે સિરીઝમાં ક્લીન સ્વીપનો સામનો કરીને આવી છે. 

ચૅ​મ્પિયન્સ ટ્રોફીમાં બન્ને ટીમ વચ્ચે પાંચ મૅચ રમાઈ છે જેમાંથી ઑસ્ટ્રેલિયા સૌથી ઓછી બે મૅચ જીત્યું છે. છેલ્લી બે મૅચ જીતનાર અંગ્રેજ ટીમ પાસે આજે કાંગારૂ ટીમ સામે આ ટુર્નામેન્ટમાં હૅટ-ટ્રિક જીત મેળવાની તક રહેશે. જોકે છેલ્લી ૧૦ વન-ડેમાંથી ૮ મૅચ ઑસ્ટ્રેલિયા જીત્યું છે, ઇંગ્લૅન્ડ બે મૅચ જીત્યું છે.

વન-ડે હેડ-ટુ-હેડ રેકૉર્ડ
કુલ મૅચ	૧૬૦
ઑસ્ટ્રેલિયાની જીત	૯૦
ઇંગ્લૅન્ડની જીત	૬૫
નો-રિઝલ્ટ	૦૩
ટાઈ	૦૨

૧૫ વર્ષથી ચૅ​મ્પિયન્સ ટ્રોફીમાં એક પણ મૅચ જીતી શકી નથી કાંગારૂ ટીમ

વર્ષ ૨૦૦૯ની ચૅ​મ્પિયન્સ ટ્રોફીની ફાઇનલમાં ન્યુ ઝીલૅન્ડને ૬ વિકેટે હરાવ્યા બાદ ઑસ્ટ્રેલિયન ટીમ આ ટુર્નામેન્ટમાં ૧૫ વર્ષથી એક પણ મૅચ જીતી શકી નથી. ૨૦૦૯ની ફાઇનલ બાદ ઑસ્ટ્રેલિયા આ ટુર્નામેન્ટમાં ૬ મૅચ રમ્યું છે, જેમાંથી ત્રણ મૅચ નો-રિઝલ્ટ રહી છે, જ્યારે ત્રણ મૅચમાં હરીફ ટીમની જીત થઈ હતી. કાંગારૂ ટીમ આજે આ ટુર્નામેન્ટમાં લાંબા સમય બાદ જીત મેળવવાના ઇરાદા સાથે ઊતરશે.