29 October, 2024 10:39 AM IST | Dhaka | Gujarati Mid-day Correspondent
બંગલાદેશની ક્રિકેટ ટીમ
આજથી સાઉથ આફ્રિકા અને બંગલાદેશની ક્રિકેટ ટીમ વચ્ચે બે મૅચની ટેસ્ટ-સિરીઝની બીજી ટેસ્ટ રમાશે. ઢાકા ટેસ્ટ ૭ વિકેટે જીતીને સાઉથ આફ્રિકાએ સિરીઝમાં લીડ મેળવી લીધી છે જેને કારણે યજમાન ટીમ આજથી ચટ્ટોગ્રામના ઝહુર અહમદ ચૌધરી સ્ટેડિયમમાં લાજ બચાવવા ઊતરશે. પાકિસ્તાન સામે ઐતિહાસિક ટેસ્ટ-સિરીઝ જીત્યા બાદ ભારત સામે ટેસ્ટ-સિરીઝ હારનાર બંગલાદેશી ટીમ સાઉથ આફ્રિકા સામે ક્યારેય ટેસ્ટ જીતી શક્યું નથી.
ચટ્ટોગ્રામના આ સ્ટેડિયમમાં બંગલાદેશની ટીમ માત્ર બે ટેસ્ટ જીતી છે. આ મેદાન પર બંગલાદેશ ૨૪ ટેસ્ટ રમ્યું છે જેમાંથી સાત ટેસ્ટ ડ્રૉ રહી છે અને ૧૫ ટેસ્ટમાં વિદેશી ટીમની જીત થઈ છે. આ મેદાન પર બંગલાદેશની ટીમ ૨૦૧૪માં ઝિમ્બાબ્વેને અને ૨૦૧૮માં વેસ્ટ ઇન્ડીઝને હરાવવામાં સફળ રહી હતી. સાઉથ આફ્રિકાએ આ મેદાન પર ૨૦૦૮માં બંગલાદેશને એક ઇનિંગ્સ અને ૨૦૫ રનથી હરાવ્યું હતું, જ્યારે ૨૦૧૫માં બન્ને ટીમ વચ્ચેની ટેસ્ટ ડ્રૉ રહી હતી.