કાર પર એક લાખ ફટાકડા ફોડ્યા

યુટ્યુબર અમિત શર્માએ દિવાળીના બરાબર પહેલાં પોતાની યુટ્યુબ ચૅનલ ક્રેઝી એક્સવાયઝેડ પર આ વિડિયો અપલોડ કર્યો હતો

અમિત શર્માએ કાર પર એક લાખ ફટાકડા ફોડ્યા

દિવાળીમાં આપણે બધા ફટાકડા ફોડીએ છીએ. જોકે ફેમસ યુટ્યુબર અમિત શર્માએ અલગ જ રીતે ફટાકડા ફોડ્યા હતા. તેણે તેની ટીમ સાથે કાર પર એક લાખથી વધારે ફટાકડા ફોડ્યા હતા. આ આખી ઘટનાને તેણે રેકૉર્ડ કરી હતી. આ વિડિયો યુટ્યુબ પર વાઇરલ થઈ રહ્યો છે.

રાજસ્થાનના અલવરમાં રહેતા યુટ્યુબર અમિત શર્માએ દિવાળીના બરાબર પહેલાં પોતાની યુટ્યુબ ચૅનલ ક્રેઝી એક્સવાયઝેડ પર આ વિડિયો અપલોડ કર્યો હતો. આ વિડિયોમાં જોવા મળ્યું હતું કે તેણે કારની બહારની બાજુ બધી જગ્યાએ ફટાકડાને ટેપથી ચોંટાડ્યા હતા. તેણે પોતાના ટીમ-મેમ્બર્સ સાથે મળીને કારની ઉપર ૫૦૦૦ અને ૧૦,૦૦૦ ફટાકડાની લૂમ લગાવી હતી. માત્ર કારના ગ્લાસ પર જ ફટાકડા નહોતા મૂક્યા. એ પછી રિમોટની મદદથી આ ફટાકડા ફોડવામાં આવ્યા હતા. એ સ્થિતિને કૅપ્ચર કરવા માટે ડ્રોન કૅમેરા, ગો-પ્રો કૅમેરા અને બીજા કૅમેરાનો ઉપયોગ કરવામાં આવ્યો હતો.

બધા ફટાકડા ફૂટ્યા બાદ કારનું બોનેટ ખોલીને જોવામાં આવ્યું તો એમાં કોઈ મોટું નુકસાન ન થયું હોવાનું જોવા મળ્યું હતું. કારની બૅટરી સંપૂર્ણપણે સલામત હતી. બધા ફટાકડા ફૂટ્યા બાદ અમિત શર્માએ કારને ચલાવવાની કોશિશ કરી હતી. પહેલી કોશિશમાં તો કાર નહોતી ચાલી, પણ થોડી વારમાં એ સ્ટાર્ટ થઈ ગઈ હતી. જોકે એ પછી ફરીથી બંધ થઈ ગઈ હતી. 
આ ટીમે કરેલું આવું સાહસ કરવું જરાય હિતાવહ નથી.