15 May, 2023 02:09 PM IST | London | Gujarati Mid-day Correspondent
સસલાએ ફસાયેલી બિલાડીને બહાર નીકળવામાં મદદ કરી
પ્રાણીમાત્રમાં મદદની ભાવના સરાહનીય હોય છે. આવા મદદગારના વિડિયો સોશ્યલ મીડિયા પર પણ પ્રશંસા પામે છે. તાજેતરમાં સોશ્યલ મીડિયા પ્લૅટફૉર્મ ટ્વિટર પર એક સસલા અને બિલાડીનો વિડિયો વાઇરલ થયો છે, જેમાં એક સસલું ઉતાવળે માટી ખોદી રહ્યું છે. પતરાના શેડની પાછળ ફસાયેલી બિલાડી થોડી-થાડી વારે સસલાને પગથી જાણે ઇશારો કરીને વધુ ખોદવા કહેતી હોય એમ સસલાને બિલાડીનો પગ અડતાં જ તે ફરીથી ખોદવા માંડે છે.
એક તબક્કે સસલું ખોદીને પછી અટકે છે, પણ બિલાડીનો ઇશારો ન મળતાં તે ખોદેલી માટીને સહેજ ખસેડીને ત્યાંથી નીકળી જાય છે અને એની પાછળ-પાછળ જ પતરાના શેડની નીચે માટી ખોદવાથી બનેલી જગ્યામાંથી બિલાડી બહાર નીકળીને જતી રહે છે. અત્યાર સુધી આ વિડિયોને ૩૦ લાખ વ્યુઝ મળ્યા છે.