વિશાળ પાઇથન સાથે રમતી આ બાળકી ઇન્ટરનેટ પર છવાઈ

નેટિઝન્સે આ વિડિયો પર અનેક કમેન્ટ્સ આપી છે, જેમાં કેટલાકે છોકરીની નીડરતાની પ્રશંસા કરવાની સાથે તેની સુરક્ષાની પણ ચિંતા વ્યક્ત કરી છે

આરિયાના

સાપને જોતાની સાથે જ લગભગ મોટા ભાગના લોકોના શરીરમાંથી ભયનું લખલખું પસાર થઈ જાય છે. આવા ભીરુ પ્રકૃતિના લોકો માટે સોશ્યલ મીડિયા પ્લૅટફૉર્મ પર વાઇરલ થયેલો આ વિડિયો કુતૂહલ પમાડે એવો છે.

આરિયાના નામની બાળકીનો પાઇથન સાથે રમતો ફોટો સોશ્યલ મીડિયા પર અપલોડ થયો છે. વિડિયોમાં બાળકો રમકડાંથી રમતાં હોય એટલી સહજતાથી આરિયાના પાઇથન સાથે રમતી જોઈ શકાય છે. કાળા રંગનો પાઇથન જમીન પર સરકી રહેલો દેખાય છે અને આરિયાના તેની બાજુમાં બેસીને રમી રહી છે. અત્યાર સુધી આ વિડિયોને ૬.૧ લાખ કરતાં વધુ વ્યુઝ મળ્યા છે તથા ૪૬,૦૦૦ લાઇક્સ મળ્યા છે. નેટિઝન્સે આ વિડિયો પર અનેક કમેન્ટ્સ આપી છે, જેમાં કેટલાકે છોકરીની નીડરતાની પ્રશંસા કરવાની સાથે તેની સુરક્ષાની પણ ચિંતા વ્યક્ત કરી છે.

આરિયાનાના ઇન્સ્ટાગ્રામ-અકાઉન્ટ પર તેના સાપ સાથે રમતા અન્ય વિડિયો પણ અપલોડ કરવામાં આવ્યા છે. આમાંના એક વિડિયોમાં પાઇથન આરિયાનાને કિસ કરતો પણ જોઈ શકાય છે.