માદા શાર્ક માછલીએ નર વિના જ બચ્ચાને જન્મ આપ્યો

શાર્ક પ્રજાતિની માછલીઓમાં નર સાથીની ગેરહાજરીમાં અલૈંગિક પ્રજનન એ છેલ્લો ઉપાય માનવામાં આવતો હતો

પ્રતીકાત્મક તસવીર

શિકાગોના શેડ ઍક્વેરિયમમાં એક માદા ઝીબ્રા શાર્કે અલૈંગિક પ્રજનનથી ‘વર્જિન બર્થ’  દ્વારા બચ્ચાને જન્મ આપ્યો છે. પાર્થેનોજેનેસિસ અથવા ‘કુંવારી જન્મ’ સામાન્ય રીતે અપૃષ્ઠવંશી (કરોડરજ્જુ ન ધરાવતાં હોય એવાં) પ્રાણીઓમાં થાય છે, જેમાં ગર્ભનો વિકાસ નર સાથે સમાગમ વિના જ થાય છે. શાર્ક પ્રજાતિની માછલીઓમાં નર સાથીની ગેરહાજરીમાં અલૈંગિક પ્રજનન એ છેલ્લો ઉપાય માનવામાં આવતો હતો. આસપાસ પુખ્ત નરની હાજરી છતાં શાર્કે અલૈંગિક પ્રજનનથી બચ્ચાને જન્મ આપ્યો હોય એવો આ બીજો કિસ્સો છે.  શિકાગોના શેડ ઍક્વેરિયમમાં માદા શાર્કે વર્જિન જન્મ આપતાં સંશોધકો આશ્ચર્યમાં પડી ગયા હતા. આ ઍક્વેરિયમમાં બબલ્સના હુલામણા નામે ઓળખાતી આ શાર્કે એની આસપાસ અનેક ઝીબ્રા શાર્કની હાજરી છતાં અલૈંગિક પ્રજનનથી બચ્ચાને જન્મ આપ્યો હતો. જિનેટિક ટેસ્ટિંગ બાદ જાણ થઈ હતી કે બબલ્સ આ બેબીશાર્કની એકમાત્ર પેરન્ટ છે. શાર્ક માછલી અલૈંગિક પ્રજનનથી બચ્ચાના જન્મ માટે જાણીતી છે, પરંપરાગત રીતે સમાગમ માટે ઉપલબ્ધ નરની અછતને કારણે બનતી આ એક દુર્લભ ઘટના છે.