ઇન્ડિયાના આઇફોન-યુઝર્સને ઍપલની વૉર્નિંગ, સ્પાયવેર અટૅકથી બચીને રહેજો

આ અટૅક હાલમાં મોટા ભાગે હાઈ-પ્રોફાઇલ વ્યક્તિઓના આઇફોન પર કરવામાં આવી રહ્યો છે

પ્રતીકાત્મક તસવીર

ઍપલે દુનિયાભરના ૯૮ દેશોને વૉર્નિંગ આપી છે અને એમાં ભારતનો પણ સમાવેશ છે. હાલમાં આઇફોનની ઑપરેટિંગ સિસ્ટમ અને સફારીમાં સ્પાયવેર અટૅક કરવામાં આવી રહ્યો છે. આ અટૅકને ખૂબ રિસ્કી ગણવામાં આવી રહ્યો છે. આ વાઇરસ ખૂબ ઍડ્વાન્સ છે અને એવો વાઇરસ રૅર કેસમાં બનાવવામાં આવે છે. આ અટૅક દ્વારા યુઝર્સના આઇફોનને રિમોટ ઍક્સેસ મળી શકે છે એથી એનો જે રીતે ઉપયોગ કરવો હોય એ રીતે રિમોટલી ઉપયોગ કરી શકાય છે. આ અટૅક હાલમાં મોટા ભાગે હાઈ-પ્રોફાઇલ વ્યક્તિઓના આઇફોન પર કરવામાં આવી રહ્યો છે. જોકે એ દરેક આઇફોનને અસર કરી શકે છે. એ માટે ઍપલે એક ઍડ્વાઇઝરી બહાર પાડી છે. કોઈ પણ વસ્તુ ડાઉનલોડ કરવા અથવા તો અટેચમેન્ટ્સમાં કંઈ આવ્યું હોય તો એને ત્યારે જ ઍક્સેસ કરવું જ્યારે એ વિશ્વાસપાત્ર વ્યક્તિ પાસેથી આવ્યું હોય. મોબાઇલની ઑપરેટિંગ સિસ્ટમને હંમેશાં અપ-ટુ-ડેટ રાખવી. સર્ફિંગ કરતી વખતે આવતી પૉપ-અપ ઍડ્વર્ટાઇઝમેન્ટ અથવા તો લિન્ક પર ક્લિક ન કરવું. પબ્લિક વાઇફાઇનો ઉપયોગ બને ત્યાં સુધી ટાળવો. આ બાબતનું ધ્યાન રાખવામાં આવે તો આ પ્રકારના અટૅકથી બચવાના ચાન્સ વધી શકે છે.