અમેરિકાના વિજ્ઞાનીઓએ વિશ્વનું પ્રથમ કૃત્રિમ હાર્ટ ટ્રાન્સપ્લાન્ટ કર્યું

દરદી ટાઇટેનિયમના કૃત્રિમ હૃદયથી અઠવાડિયું જીવ્યો

કૃત્રિમ હૃદય

અમેરિકાના વિજ્ઞાનીઓએ અદ્ભુત ચમત્કાર કરી બતાવ્યો છે. વિજ્ઞાનીઓએ ટાઇટેનિયમથી કૃત્રિમ હૃદય બનાવ્યું હતું. તેમણે ૫૮ વર્ષના દરદીનું ખરાબ થઈ ગયેલું હૃદય કાઢીને આ કૃત્રિમ હૃદય મૂક્યું હતું. તબીબોના કહેવા પ્રમાણે દરદીની છાતીમાં એ કૃત્રિમ હૃદયે આઠ દિવસ સુધી કામ કર્યું હતું. કૃત્રિમ હૃદયના ટ્રાન્સપ્લાન્ટનો આ વિશ્વનો પ્રથમ પ્રયોગ હોવાનો દાવો પણ કરાયો છે. યુએસ ફૂડ ઍન્ડ ડ્રગ ઍડ્મિનિસ્ટ્રેશનની દેખરેખ હેઠળ ટેક્સસ હાર્ટ ઇન્સ્ટિટ્યૂટની મેડિકલ ડિવાઇસ કંપની બાઇવેકરે ટાઇટેનિયમનું કૃત્રિમ હૃદય બનાવ્યું છે. ઇન્સ્ટિટ્યૂટના જ વાયલર સેન્ટ લ્યુક મેડિકલ સેન્ટરમાં એનું પ્રત્યારોપણ કરવામાં આવ્યું હતું. માનવહૃદયનાં તમામ કાર્યો કરી શકે એ માટે કૃત્રિમ હૃદય બનાવાયું છે, પરંતુ ટોટલ આર્ટિફિશ્યલ હાર્ટ અસલી હૃદયની જેમ ધબકતું નથી. આ હૃદય મિનિટદીઠ ૧૨ લીટરના દરે લોહીનું પરિભ્રમણ કરે છે.