રીલ બનાવવાના ચક્કરમાં રિવર્સ ગિયરમાં ભૂલથી ઍક્સેલરેટર દાબી દેતાં યુવતી ખીણમાં પડીને મરી ગઈ

ગંભીર ઈજા થતાં યુવતીનું ઘટનાસ્થળે જ મૃત્યુ થયું હતું. બચાવ-કર્મચારીઓને યુવતી સુધી પહોંચવામાં એક કલાકથી વધુ સમય લાગ્યો હતો.

વાયરલ વીડિયોમાંથી સ્ક્રીન શૉટ

સોશ્યલ મીડિયા માટે વિડિયો બનાવવાના ચક્કરમાં લોકોએ જીવ ગુમાવવો પડે એવી ઘટના અવારનવાર બને છે. આવી જ એક ઘટના સંભાજીનગરમાં બની હતી જેમાં એક યુવતીની કાર ઊંડી ખીણમાં ગબડી જતાં તેનું ઘટનાસ્થળે જ મૃત્યુ થયું હતું. દરમ્યાન યુવતીનો મિત્ર રીલ બનાવી રહ્યો હતો એટલે સમગ્ર દુર્ઘટના કૅમેરામાં રેકૉર્ડ થઈ ગઈ હતી. આ વિડિયો ત્યાર બાદ સોશ્યલ મીડિયા પર વાઇરલ થયો હતો.

મુંબઈથી ૩૪૦ કિલોમીટર દૂર સંભાજીનગરમાં સુલીભંજન દત્તાધામ મંદિર પાસે ૨૩ વર્ષની શ્વેતા દીપક સુરવાસે સોમવારે બપોરે તેના મિત્ર સાથે કારમાં ફરવા ગઈ હતી. આ જગ્યાએ રીલ બનાવવા માટે શ્વેતા પોતે ડ્રાઇવર સીટ પર બેસી ગઈ અને તેણે મિત્ર શિવરાજ મુળેને વિડિયો બનાવવાનું કહ્યું હતું. શ્વેતાએ ગાડી રિવર્સમાં તો લીધી, પણ બ્રેક લગાવવાને બદલે ભૂલથી બૅક ગિયરમાં ઍક્સેલરેટર દબાવી દીધું એટલે કાર ક્રૅશ બૅરિયર તોડીને ૩૦૦ ફુટ ઊંડી ખાઈમાં ગબડી ગઈ હતી. ગંભીર ઈજા થતાં યુવતીનું ઘટનાસ્થળે જ મૃત્યુ થયું હતું. બચાવ-કર્મચારીઓને યુવતી સુધી પહોંચવામાં એક કલાકથી વધુ સમય લાગ્યો હતો.