03 April, 2023 11:55 AM IST | Mumbai | Gujarati Mid-day Online Correspondent
પ્રતિકાત્મક તસવીર
એલન મસ્ક(Elon Musk)કહ્યું હતું કે એક એપ્રિલથી ફ્રી બ્લૂ ટિક હટાવી દેવામાં આવશે. ધનાઢ્ય બિઝનસમેન એલન મસ્કે કહ્યું હતું કે તમામ ફ્રી બ્લૂ ટિક હટાવામાં આવશે એટલે કે યુઝર્સ માટે ફ્રી બ્લૂ ટિકની સુવિધા નહીં રહે. પરંતુ આજે એટલે કે 3 એપ્રિલ થઈ હોવા છતાં ટ્વિટર યુઝર્સના અકાઉન્ટમાં બ્લૂ ટિક યથાવત છે. હા, એક બદલાવ જરૂર જોવા મળ્યો છે.
કંપની તરફથી થોડા દિવસો પહેલા ટ્વીટ કરીને જાણકારી આપવામાં આવી હતી કે 1 એપ્રિલથી સબસ્ક્રિપ્શન વિનાના બ્લુ ટિકવાળા યુઝર્સના આઈડી પરથી બ્લુ બેજ હટાવી દેવામાં આવશે. એટલે કે, વાદળી બેજ ફક્ત ટ્વિટર બ્લુ સેવા ધરાવતા વપરાશકર્તાઓના ID પર જ રહેશે. તારીખ વીતી ગઈ પણ બ્લૂ બેજ ગયો નથી. જ્યારથી કંપનીએ આની જાહેરાત કરી ત્યારથી કેટલાક યુઝર્સ તેના વિશે ચિંતિત હતા. ઘણા લોકોએ કંપનીના આ નિર્ણયનો વિરોધ પણ કર્યો હતો. આટલું જ નહીં કેટલીક સેલિબ્રિટીઓએ કંપનીની સબસ્ક્રિપ્શન પોલિસીનો વિરોધ પણ કર્યો છે. લેબ્રોન જેમ્સ એ અત્યાર સુધીના સૌથી વધુ વેતન મેળવનાર NBA ખેલાડીઓમાંના એક છે અને દર વર્ષે $40 મિલિયનથી વધુ કમાણી કરે છે. તેણે ટ્વિટરને પૈસા આપવાનો પણ ઇનકાર કર્યો હતો.
જ્યારથી કંપનીએ સબસ્ક્રિપ્શન પોલિસી શરૂ કરી છે. તે પૈસા ચૂકવીને બ્લૂ ટિક મેળવનારા યુઝર્સના અકાઉન્ટને સબસ્ક્રાઈબ (This account is verified because it’s subscribed to Twitter Blue)થયેલું બતાવી રહી હતી અને પૈસા આપ્યા પહેલાના વેરિફાઈડ યૂઝર્સની આઈડી પર લિગેસી એકાઉન્ટ((This account is verified because it’s a legacy verified account) લખેલું આવતું હતું. હવે બંને પર એક જ જાણકારી આવી રહી છે. હવે તમે બ્લૂ ટિક પર ક્લિક કરશો તો લખેલું જોવા મળશે કે આ અકાઉન્ટને સબસ્ક્રાઈબ કરવામાં આવ્યું છે અથવા તો આ લિગેસી અકાઉન્ટ છે.
આ પણ વાંચો: Meta Verified: ફેસબુક અને ઈન્સ્ટાગ્રામમાં બ્લુ ટિક માટે ચૂકવવા પડશે આટલા પૈસા
કંપનીએ આ માટે અલગ-અલગ દેશોમાં અલગ-અલગ ચાર્જ નક્કી કર્યા છે. ભારતીય યુઝર્સને ટ્વિટર બ્લુ ટિક મેળવવા માટે દર મહિને 650 રૂપિયા ચૂકવવા પડશે. જો તમે દર મહિને 650 રૂપિયા ચૂકવો છો, તો તમારે એક વર્ષમાં 7800 રૂપિયા ચૂકવવા પડશે, જ્યારે વાર્ષિક પ્લાન લેવાથી ઘણા પૈસા બચશે. નોંધનીય છે કે ટ્વિટર બ્લુ ટિકનો વાર્ષિક પ્લાન 6800 રૂપિયા છે. ટ્વિટર બ્લુ ટિકની સેવા લીધા પછી તમે 4 હજાર અક્ષરોમાં ટ્વિટ કરી શકશો. આ સર્વિસમાં તમને 30 મિનિટમાં 5 વખત એડિટ કરવાની સુવિધા મળે છે. બ્લુ ટિક સર્વિસ મેળવવા ઉપરાંત યુઝર્સ ટ્વિટર પર ફુલ એચડી ક્વોલિટી વીડિયો પણ શેર કરી શકશે. બ્લુ ટિક વેરિફાઈડ યુઝર્સને પણ પ્લેટફોર્મમાં પ્રાથમિકતા આપવામાં આવશે.
એક અહેવાલ પ્રમાણે ટ્વીટર પર જાહેરાતો પાછળ સૌથી વધુ ખર્ચ કરતી ટોચની 500 સંસ્થાઓએ તેમની ચકાસણી સ્થિતિ જાળવવા માટે તેમની બ્લુ ટિક્સને જાળવી રાખવા માટે દર મહિને $1,000 ચૂકવવા પડશે નહીં. આ સાથે 10000 કંપનીઓ કે જેમના ફોલોઅર્સની સંખ્યા સૌથી વધુ છે તેમને પણ પૈસા ચૂકવવા પડશે નહીં. ટ્વિટર દ્વારા આ નિર્ણય એવા સમયે લેવામાં આવ્યો છે જ્યારે માઇક્રોબ્લોગિંગ સાઇટ પર વેરિફિકેશન માટે મોટાપાયે ફેરફાર કરવામાં આવી રહ્યા છે. ટ્વિટરે ગયા મહિને ટ્વિટ કર્યું હતું કે વેરિફાઈડ ઓર્ગેનાઈઝેશન્સ હવે વૈશ્વિક સ્તરે ઉપલબ્ધ છે અને વેઈટીંગ લિસ્ટમાં રહેલા લોકો જેમની વિનંતીઓ સ્વીકારવામાં આવી છે તેમને મેઈલ કરવામાં આવી રહ્યા છે.