પરીક્ષા-પદ્ધતિમાં રહેલી ખામીઓને દૂર કરવા NTAને આધુનિક ટેક્નૉલૉજીનો ઉપયોગ કરવા સુપ્રીમ કોર્ટનો આદેશ

સુપ્રીમ કોર્ટે કહ્યું હતું કે અમે માળખાકીય પ્રક્રિયામાં ખામીઓ પર પ્રકાશ પાડ્યો છે

સુપ્રીમ કોર્ટની ફાઇલ તસવીર

દેશમાં વિવિધ પરીક્ષાનું સંચાલન કરતી નૅશનલ ટેસ્ટિંગ એજન્સી (NTA)ને પરીક્ષા-પદ્ધતિમાં પેપર-લીક જેવી બાબતો રોકવા, એમાં રહેલી ખામીઓને શોધવા માટે આધુનિક ટેક્નૉલૉજીનો ઉપયોગ કરવાનો નિર્દેશ સુપ્રીમ કોર્ટે આપ્યો હતો. નૅશનલ એલિજિબિલિટી એન્ટ્રન્સ ટેસ્ટ અન્ડર ગ્રૅજ્યુએટ (NEET-UG) પરીક્ષામાં પેપર-લીક બાદ NTAને ભારે ટીકાઓનો સામનો કરવો પડી રહ્યો છે.

ગઈ કાલે સુનાવણી વખતે સુપ્રીમ કોર્ટે કહ્યું હતું કે અમે માળખાકીય પ્રક્રિયામાં ખામીઓ પર પ્રકાશ પાડ્યો છે. સ્ટુડન્ટ્સના ભાવિ માટે આ સારું નથી એટલે એમાં સુધારા થવા જરૂરી છે.
ચીફ જસ્ટિસ ડી. વાય. ચંદ્રચૂડની આગેવાની હેઠળની બેન્ચે આ મામલે તપાસ કરવા માટે નિમાયેલી સમિતિને ૩૦ સપ્ટેમ્બર સુધીમાં તેમનો રિપોર્ટ સુપરત કરવા જણાવ્યું છે. આ સમિતિમાં ઇન્ડિયન સ્પેસ રિસર્ચ ઑર્ગેનાઇઝેશન (ISRO)ના ભૂતપૂર્વ ચીફ ડૉ. કે. રાધાકૃષ્ણન અને દિલ્હી ઑલ ઇન્ડિયા ઇન્સ્ટિટ્યૂટ ઑફ મેડિકલ સાયન્સિસ (AIIMS)ના ભૂતપૂર્વ ડિરેક્ટર ડૉ. રણદીપ ગુલેરિયાનો સમાવેશ છે. આ સમિતિને સમગ્ર પરીક્ષા-પ્રક્રિયાનું વિશ્લેષણ કરવા અને વધુ કાર્યક્ષમ બનાવવા ફેરફારો સૂચવવાની કામગીરી સોંપવામાં આવી છે.